Óskemende túrmeden qashyp ketken adam birneshe saǵattyń ishinde ustaldy
ÓSKEMEN. QazAqparat – Óskemen qalasynda túrmeden qashyp ketken adam birneshe saǵattyń ishinde ustaldy, dep habarlaıdy QazAqparat tilshisi.
22 aqpanda Shyǵys Qazaqstan oblysy boıynsha QAJ departamentiniń №16 túzetý mekemesinde jazasyn ótep jatqan er adam qashyp ketken. Belgili bolǵandaı, ol osydan eki jyl buryn tonaý jasaǵany úshin QR Qylmystyq Kodeksiniń 192-baby 2-bóligine sáıkes bas bostandyǵynan aıyrylǵan.
ShQO Polıtsııa departamenti baspasóz qyzmetiniń málimetine súıensek, tártip saqshylary aqparat túse salasymen birden jedel-izdestirý sharalaryna kiristi. Sottalǵan adam sol kúni qolǵa tústi.
«Polıtseıler er adamdy birneshe saǵattyń ishinde Óskemendegi kóshelerdiń birinde ustady. Qazirgi ýaqytta QR QK-niń 426-babyna (qamaý oryndarynan qashý) sáıkes sotqa deıingi tergeý amaldary júrgizilip jatyr», - delingen aqparatta.
