Óskemende túrme kúzetshisi oq atyp, tyıym salynǵan aýmaqqa ótpek bolǵandardy toqtatty

ÓSKEMEN.KAZINFORM - Óskemen qalasyndaǵy túzetý mekemesinde 6699 áskerı bóliminiń sarbazy sottalǵandardyń tyıym salynǵan aýmaqqa zańsyz ótpek bolǵan áreketin der kezinde baıqap qalǵan.

Oqıǵa kolonııaǵa tyıym salynǵan zattar laqtyrylǵannan keıin bolǵan. Belgili bolǵandaı, túrme aýmaǵyna barlyǵy 9 túıinshek tastalǵan. Olardyń biri ishke túspeı, qorshaýǵa ilinip qaldy.

Sol sońǵy zatty alý maqsatynda tórt sottalǵan adam ishki tyıym salynǵan aımaqqa ótip ketken. QR UU «Shyǵys» óńirlik qolbasshylyǵy baspasóz qyzmetiniń málimetinshe, kúzetshi jaǵdaıdy der kezinde baıqap, nusqaýlyqqa sáıkes áreket etti.

- Áskerı qyzmetshi sózben eskertýler jasap, jaǵdaı týraly birden qaraýyl bastyǵyna habar beredi. Alaıda sottalǵandar onyń talaptaryna qulaq aspaǵan, - delingen aqparatta.

Sottalǵandardyń biri tyıym salynǵan aımaqqa ótýdi jalǵastyrǵan kezde áskerı qyzmetshi nusqaýlyqqa saı shara qoldandy.

- Aýaǵa eskertý oǵy atyldy. Tártip buzýshylyq birden toqtatylyp, jaǵdaı qalypqa keldi. Qazirgi ýaqytta sottalǵandar qatań jaǵdaıǵa aýystyrylǵan, - delingen habarlamada.

Qolbasshylyqtyń dereginshe, áskerı qyzmetshiniń shuǵyl ári durys áreketi ary qaraıǵy zańbuzýshylyqtyń aldyn alyp, túrme qaýipsizdigin qamtamasyz etýge múmkindik berdi.

Eske salsaq, osyǵan deıin Astanada 200-den asa sarbaz Otanǵa adal bolýǵa ant bergeni habarlanǵan.