Óskemende turǵyn úı podezderiniń esikteri urlanyp jatyr
ÓSKEMEN. QazAqparat - Óskemendegi kópqabatty úılerdiń kire berisindegi qymbat temir esikter urlanyp jatyr. Polıtseıler qylmyskerlerdi izdestirýde, dep habarlaıdy «QazAqparat» HAA.
Qala turǵyndary áleýmettik jelilerde osy máseleni kóterip, birqatar jazbalar qaldyrǵan. Olardyń aıtýynsha, belgisiz bireýler domofondy esikterdi urlaýdy ádetke aınaldyrǵan. Qoldanýshylardyń biri 25 qańtar kúni Qazaqstan kóshesi, 107-úıdiń podezinen esik urlanǵanyn jazady.
«Urlyq 25 qańtar kúni keshki 18.00 shamasynda jasalǵan. Esikti sheship alý úshin urylar biraz ýaqyttaryn jumsapty. Oqıǵa beınekameraǵa jazylyp qaldy, biraq qylmyskerdiń bet-álpeti kórinbeıdi», - dedi «Ýnıversal» páter ıeleri kooperatıvi ókilderi.
Osyǵan uqsas qylmys Qazaqstan kóshesindegi 103-úıde jáne Myzy kóshesinde de oryn alǵan.
«Urlyq» baby boıynsha qylmystyq is qozǵalyp, atalǵan iske qatysy bar adamdar izdestirilip jatyr», - dep habarlady ShQO ІІD baspasóz qyzmeti.
Úılerdiń kire berisindegi domofondy esikterdiń baǵasy kem degende 100 myń teńgeden bastalady eken.
