Óskemende turǵyndar egeýquıryqtardyń qaptap ketkenine shaǵymdandy
ÓSKEMEN. KAZINFORM — Óskemen qalasynyń turǵyndary birneshe kóshedegi kópqabatty úıler mańynda egeýquıryqtardyń jappaı kóbeıip ketkenine shaǵymdandy. Olardyń aıtýynsha, kemirgishter turǵyn úıler men qoqys jáshikteri ornalasqan aýmaqta qaptap júredi.
Másele Astana kóshesindegi № 4 jáne № 6 úılerge, N. Nazarbaev dańǵylyndaǵy № 1, № 1/1, № 3 jáne № 3/1 úılerge qatysty.
Turǵyndar bul týraly áleýmettik jelige vıdeolar jarııalap, óz narazylyqtaryn bildirip jatyr. Kadrlardan qoqys jáshikteri ornalasqan aýmaqta birneshe egeýquıryqtyń júrgenin kórýge bolady.
— Egeýquıryqtar qaptap ketti. Turǵyn úılerdiń janynda, qoqys tógiletin jerde erkin júredi. Bul týraly PIK-ke de aıttyq. Kemirgishtermen kúres tek jekelegen jertólelerdi óńdeýmen shektelmese deımiz. Qoqys mańy men oǵan irgeles aýmaqty qosa alǵanda, búkil oshaqqa keshendi deratızatsııa júrgizilýi qajet, — deıdi kóshe turǵyndary.
Osy máselege qatysty Óskemen qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminen jaýap berdi.
— Kúzgi deratızatsııa jumystary aıasynda 28-31 tamyz aralyǵynda qala aýmaǵynda ýlanǵan jemderdi alǵashqy ret ornalastyrý jumystary júrgizildi. Barlyǵy 7 kúndik aralyqpen 3 ret ýlanǵan jem ornalastyrý josparlanǵan. Buǵan deıin osyndaı jumystar kóktemde júrgizilgen. Qoldanylatyn rodentıtsıdterdiń áseri birden baıqalmaıdy. Kemirgishter ýlanǵan jemdi jegennen keıin birneshe kún ótken soń óledi. Osy kezeńde olardyń minez-qulqy ózgerip, sý izdep, turaqty mekendeý oryndarynan syrtqa shyǵýy múmkin, — delingen jaýapta.
Vedomstvo dereginshe, osyǵan baılanysty kemirgishterdiń kúndizgi ýaqytta, onyń ishinde qoqys konteınerleri ornalasqan aýmaqta paıda bolýy deratızatsııa jumystary júrgizilmegenin nemese onyń tıimsizdigin bildirmeıdi.
— 5-6 qyrkúıekte ýlanǵan jemderdi ekinshi ret ornalastyrý jumystary júrgizildi. Belgilengen 7 kúndik aralyq ótkennen keıin kúzgi deratızatsııa jumystarynyń aıasynda úshinshi, qorytyndy ornalastyrý júrgiziledi. Kúzgi deratızatsııa jumystary belgilengen kestege sáıkes jalǵasyp jatyr. Eń joǵary tıimdilikke qoqys konteınerleri ornalasqan alańdardy, olarǵa irgeles aýmaqtardy jáne kóppáterli turǵyn úılerdiń jertólelerin keshendi óńdeý arqyly qol jetkiziledi, — delingen aqparatta.
Eske salsaq, osyǵan deıin Óskemende qoqys shyǵarý tarıfi ózgergeni habarlanǵan.
