Óskemende tuńǵysh ret Shámshi ánderiniń baıqaýy ótedi
ASTANA. 18 tamyz. QazAqparat - Óskemende 20-21 qyrkúıek kúnderi tuńǵysh ret Shámshi ánderiniń baıqaýy ótedi. Bul týraly Shyǵys Qazaqstan oblystyq mádenıet basqarmasynyń bastyǵy Jaqsylyq Omar BAQ ókilderimen ótkizgen baspasóz máslıhatynda málimdedi, dep jazady «Alash aınasy» gazeti.
Sonymen qatar, tamyzdyń 31-i kúni Óskemendegi Jambyl atyndaǵy drama teatrda respýblıka aqyndarynyń bıyl úshinshi ret ótkizilip otyrǵan dástúrli «Shyǵys shynary» atty jyr músháırasy óz máresine jetedi. Al qazan aıynyń alǵashqy onkúndiginde respýblıkalyq aqyndar aıtysy ótedi dep kútilýde. Sondaı-aq osy qazan aıynda dástúrli ánderdi oryndaýshylar arasynda halqymyzdyń uly kompozıtory ári arqaly aqyndarynyń biri Áset Naımanbaevtyń 145 jyldyǵyna oraı ánshilerdiń «Alashtan án ozdyrǵan» atty halyqaralyq baıqaýy men kúlli túrki halyqtarynyń altyn besigi, Abaı, Shákerim eli - Shyǵys Qazaqstannan qanat qaqqan áıgili óner jáne sport juldyzdaryn qamtıtyn «Aǵajaı - Altaı» atty ádebı-mýzykalyq kesh ótkizilmek.
