Óskemende tuńǵysh ret mıǵa kúrdeli ota jasaldy
ÓSKEMEN. QazAqparat - Óskemendik neırohırýrgtar mıyna qan quıylǵan naýqasty aman alyp qaldy, dep habarlaıdy QazAqparat tilshisi.
Shemonaıha aýdanynyń turǵyny Svetlana Vaganova 19 qańtar kúni oblystyq ınsýlt ortalyǵyna túsken bolatyn. Kompıýterlik tomografııa qantamyrlardyń jarylýy saltarynan mıǵa qan quıylǵanyn anyqtaıdy. Jarylǵan tamyrlar tereńde jatqandyqtan basúıekti oıý qaýipti bolǵan. Sondyqtan, neırohırýrgtar angıograftyń kómegine júgingen.
«Otany basúıekti oımaı-aq jasadyq. Sonyń arqasynda qan joǵaltý bolǵan joq» deıdi neırohırýrg Dmıtrıı Nedbaılo.
Qazir Svetlana Vaganova erkin sóılep, kúle alady. Ózdiginen qozǵala bastaǵan. 
«Otadan keıin 3 saǵattan soń es jıdym. Shemonaıhada qalǵan týystarym qatty alańdapty. Qyzdarym áli qýanyp júr. Bul kún ómirimdegi erekshe kún bolyp qalary sózsiz» - deıdi ol.
Jýyqta ornatylǵan angıograftyń kómegimen ortalyq mamandary 39 jastaǵy semeılik jigittiń de ómirin arashalap qalǵan. Vadım Tkachenko Semeıden aýyr halde jetkizilipti. Zertteý barysynda onyń ishki uıqy qantamyry bitelip qalǵany anyqtalady. Osynyń saldarynan mıdyń sol jaq jartysharyna qan júrmeı qalǵan.
«Munyń sońy mı ınfargyna ákedi. Sondyqtan mıdyń sol jaq jarty sharyna ota jasap, syrtqy uıqy qantamyrǵa torap jalǵadyq. Sol arqyly mıdaǵy qan aınalym qalpyna keldi» - deıdi Dmıtrıı Nedbaılo.
Ota sátti ótip, naýqas kelesi kúni-aq júrip ketken.
Byltyr alynǵan angıograf ınsýlt ortalyǵyndaǵy mamandardyń jumysyn ájeptáýir jeńildetken. Jarty jyldyń ishinde 200-den astam ota jasalypty. Oǵan deıin mundaı naýqastardy Astana men Almatyda emdeletin.
