Óskemende tuman seıilgenimen, aýa sapasy áli de talapqa saı emes

ÓSKEMEN. KAZINFORM – Óskemende qolaısyz meteorologııalyq jaǵdaı aıaqtalǵanymen, qaladaǵy aýa sapasy áli de kóńil kónshitpeı otyr.

«Qazgıdromet» RMK oblystyq fılıaly 3 aqpandaǵy atmosferalyq aýanyń jaı-kúıi týraly málimetterdi jarııa etti. Jelsiz kúnder aıaqtalǵanyna qaramastan aýa quramynda birqatar lastaýshy zattar boıynsha shekti ruqsat etilgen mólsherden asyp ketý faktisi tirkelip otyr.

- Eń joǵary kórsetkish kómirtek totyǵyna tıesili. Onyń kontsentratsııasy normadan 2,5 ese asqan. Sondaı-aq kúkirt dıoksıdi boıynsha - 2,1 ese, kúkirtsýtek - 2 ese, azot totyǵy - 1,4 ese shekti deńgeıden asqany anyqtaldy, - delingen aqparatta.

Osylaısha, bir aptaǵa sozylǵan tumannan keıin qala qolaısyz meteojaǵdaı rejıminen shyqqanymen, aýa sapasy áli de nashar.

Mamandar jeldiń bolmaýy men temperatýralyq ınversııa jaǵdaıynda lastaýshy zattardyń atmosferanyń jerge jaqyn qabatynda jınalatynyn aıtyp otyr.

«Qazgıdromet» RMK qyzmetkerleri Óskemendegi aýa sapasyna táýlik boıy monıtorıng júrgizilip jatqanyn jáne alynǵan derekterdiń jedel túrde tıisti qyzmetterge joldanyp otyrǵanyn málimdedi.

Eske salsaq, osyǵan deıin Konstıtýtsııa jobasy qorshaǵan ortany qorǵaýdy ulttyq basymdyq retinde bekitetindigi habarlanǵan.