Óskemende tozyǵy jetken káriz kollektorynyń saldarynan jer úılerdiń aýmaǵyna sý jaıylyp jatyr

ÓSKEMEN. KAZINFORM – Óskemen qalasyndaǵy Mırnyı kentinde tozyǵy jetken káriz kollektorynyń saldarynan jer úılerdiń aýmaǵyna qaıta-qaıta sý jaıylyp jatyr. 

Mırnyı kentiniń halqy ábden tozyǵy jetken №17 káriz kollektorynyń jóndelgenin kútip júrgenine talaı ýaqyt boldy. ShQO Energetıka jáne turǵyn úı-kommýnaldyq sharýashylyq basqarmasynyń málimetinshe, 2021 jyldan bastap osy ýaqytqa deıin qysym kollektorynda 17 ret apat bolǵan.

Sonyń saldarynan Kýratov jáne Mashýkova kóshelerindegi jeke turǵyn úılerdiń aýmaǵyna káriz sýy jaıylyp turady. Keıde sý jer astyna sińip ketedi. 

«Osy jyldyń mamyr jáne qyrkúıek aılarynda káriz kollektorynda apat bolyp, Kýratov kóshesindegi úılerdiń aýmaǵyna sý kirdi. Qazirgi ýaqytta «№17 káriz kollektorynyń ýchaskelerin qaıta qurý» jobasy ázirlengen. Jelilerdiń uzyndyǵy 1,5 shaqyrymdy quraıdy. Konkýrstyq rásimder júrgizilip, «Service SMÝ» JShS-men kelisim shart jasaldy. Osy jyly uzyndyǵy 423 metr bolatyn apatty ýchaskelerdiń birin jóndeý josparlanyp otyr. Jalpy quny 2,6 mlrd teńgeni quraıtyn joba 2025 jyly aıaqtalady», - dep habarlady basqarmadan. 

Eske salsaq, osyǵan deıin Óskemende bıyl da kómir alýǵa uzyn-sonar kezek qalyptasýy múmkin ekendigi habarlanǵan.