Óskemende tórt jasar bala terezeden qulap ketti
ÓSKEMEN. QazAqparat – Óskemende tórt jasar bala 5 qabattaǵy terezeden qulap ketti, dep habarlaıdy QazAqparat tilshisi.
Qalalyq Tótenshe jaǵdaılar basqarmasy baspasóz qyzmetiniń málimetinshe, oqıǵa búgin saǵat 15.47-de Dobrolıýbov kóshesinde oryn alǵan. Ata-anasynyń qaraýynsyz qalǵan 2016 jylǵy búldirshin 5 qabattaǵy páterdiń terezesinen qulap ketti.
«Birneshe jerden jaraqattanǵan bala aýyr halde aýrýhanaǵa tústi. Bul Óskemende balalardyń terezeden qulaýynyń ekinshi jaǵdaıy. Al jalpy oblys boıynsha osyndaı 4 fakti tirkeldi. Barlyq oqıǵanyń sebep-saldary birdeı – búldirshindi úıde jalǵyz tastap ketip terezeni ashyq qaldyrý», - dep habarlady vedomstvo ókilderi.
Qutqarýshylar qaýipsizdik sharalaryn jiti túsindirip jatsa da, turǵyndar arasynda balalaryn qaraýsyz qaldyryp ketetinder áli de barshylyq.
Osy rette, TJD ata-analarǵa barynsha abaı bolyp, balany bir mınýtqa da jalǵyz qaldyrmaý kerektigin eskertedi. Terezege temir tor ornatyp, jıhazdy meılinshe terezeden alys qoıǵan jón.
