Óskemende tórt balasyna 2,5 mln teńge alıment tólemeı júrgen boryshker tabyldy
ÓSKEMEN. QazAqparat – Óskemen qalasynyń polıtseıleri balalaryna 2,5 mln teńge alıment tólemeı júrgen er adamdy tapty, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, qalalyq PB kóshi-qon qyzmeti bólimine jeke sot oryndaýshysynyń qaýlysy kelip túsken.
Onda jazylǵandaı, kámeletke tolmaǵan tórt balasyna alıment tóleýden jaltarǵan 50 jastaǵy er adamnyń jalpy qaryzy 2 500 000 teńgeden asqan.
Tártip saqshylary birden qashyp júrgen boryshkerdi izdeýge kiristi.
«Jedel-izdestirý sharalary barysynda kóshi-qon qyzmetiniń mamandary alıment tólemeı júrgen azamattyń ornalasqan jerin anyqtady. Óskemennen tabylǵan er adam sol kúni-aq qaryz mólsherin tolyqtaı ótedi», - dedi oblystyq PD bastyǵy Saǵat Madıev.
Aıta keteıik, jyl basynan beri polıtsııa qyzmetkerleri alıment tólemegen 350-den astam adamdy anyqtaǵan.
