Óskemende tolassyz jaýǵan qar kólik qozǵalysyn qıyndatyp jiberdi
ÓSKEMEN. QazAqparat - Óskemende táýlik boıy tolassyz jaýǵan qar kóshelerde kólik qozǵalysyn qıyndatýda. «Óskemen tártip» mekemesiniń ókilderi joldarda paıda bolǵan muz tómpeshikterin joıý úshin eki táýlik ýaqyt qajet dep otyr, dep habarlaıdy QazAqparat tilshisi.
Ótken senbiden beri óskemendikterdiń mazasyn mezgilsiz jaýǵan qalyń qar alyp tur. Qala kósheleriniń tazalyǵyna jaýapty «Óskemen tártip» mekemesiniń dırektory Tamara Rahymjanovanyń aıtýynsha senbiden beri jol tazalaýshylar táýliktik jumys kestesine kóshipti.
«Kóktemde jaýǵan qar ylǵaldy keledi. Onyń ústine aýa temperatýrasy da jyly. Osynyń saldarynan qar birden muzǵa aınalyp, joldar tómpeshikke tolyp ketti. Ony tek greıder alady. Keshegi túnnen beri qala kóshelerinde 118 tehnıka jumys istep júr. Búgin keshke olardyń qataryn 17 greıder tolyqtyrmaq. Bir túnniń ishinde 7,1 santımetr qar tústi. Jeti merdiger kompanııanyń barlyǵy jumysqa tartyldy. Tek «Óskemen tártip mekemesiniń» kamazdary tún saıyn 1,5 myń sharshy metr qar shyǵarýda. Ótken jyldary bir túnde 600-700 tekshe metr qar tasıtynbyz. Osydan-aq mezgilsiz túsken qardyń qanshalyq álek salǵanyn ańǵarýǵa bolady», - deıdi Tamara Rahymjanova.
Onyń taıtýynsha, kólikterdiń kedergisiz júrýi úshin eki táýlik ýaqyt kerek. Al osyǵan deıin túsken qardy syrtqa shyǵarý úshin áli 1,5 apta qajet.
«Jer tońynyń tereńdigi de qıyndyq týǵyzýda. Erı jaýǵan qar jerge sińe almaı muz bop qatyp jatyr», - deıdi mekeme dırektory.
«Qazgıdromet» boljamdary da kóńil kónshitpeı otyr. Oblys boıynsha aldaǵy eki kúnge dabyldy eskertý jarııalandy. Mekemeniń málimetine súıensek, 6-7 naýryzda oblys boıynsha qar aralas jańbyr údeıdi. Kúndiz kóshelerde kóktaıǵaq bolyp, ońtústik-batystan soqqan jeldiń jyldamdyǵy 28-30 m/s-ke deıin jetedi dep kútilýde. 7 naýryzda aýa temperatýrasy plıýs 3-8 gradýsqa deıin jylynýy múmkin. 
