Óskemende toǵyzqabatty úıden órt shyǵyp, 5 adam qutqaryldy

Óskemen qalasynda toǵyzqabatty úıden órt shyǵyp, 5 adam qutqaryldy, dep habarlaıdy Kazinform. 

ShQO Tótenshe jaǵdaılar departamenti baspasóz qyzmetiniń málimetine súıensek, órt qaladaǵy Slavskıı atyndaǵy jaǵalaý kóshesinde shyqqan.

Toǵyzqabatty úıdiń 8-qabatyndaǵy elektr qalqany órtendi. Qyzyl jalyn turǵyn úıdiń birinshiden toǵyzynshy qabatyna deıingi elektr kabeline túgel tarady.

«Oqıǵa ornyna órt sóndirýshiler shuǵyl attandy. Olar kelip jetkenge deıin tútin basqan podez ishinen 20 adam óz betterimen syrtqa shyǵyp úlgergen. TJD qyzmetkerleri arnaıy maska kómegimen 5 turǵyndy jedel qutqardy», - delingen aqparatta.

Kóp uzamaı órt sóndirýshiler jalpy aýdany 27 sharshy metr tilsiz jaýdy tolyqtaı aýyzdyqtady. Otpen kúreske jeke quramnan 25 adam men 8 tehnıka jumyldyrylǵan.

Boljam boıynsha órttiń shyǵý sebebi – elektr jabdyqtaryn ornatý jáne paıdalaný kezinde qaýipsizdik talaptaryn saqtamaý.