Óskemende tıtan untaǵynan onkologııalyq aýrýlardy emdeıtin ımplantattar jasalady

ASTANA. KAZINFORM — Shyǵys Qazaqstan oblysynda áleýmettik ınfraqurylym jańaryp, jańa mektepter men medıtsına nysandary salynyp jatyr. Bul týraly ShQO ákimi Nurymbet Saqtaǵanov aıtyp berdi.

— «Keleshek mektepteri» ulttyq jobasy aıasynda 7 zamanaýı mektep salyndy. Jergilikti bıýdjet esebinen 3 myń oryndyq 3 mekteptiń qurylysy aıaqtaldy. Sonymen qatar, 600 orynǵa arnalǵan 7 shaǵyn mektep salynyp jatyr. Áleýmettik yntymaqtastyq aıasynda «Kaztsınk» kompanııasy Rıdderde 600 oryndyq mektep qurylysyn bastady, — dedi oblys ákimi Ortalyq kommýnıkatsııalar qyzmetindegi brıfıngte.

Sonymen birge, «Aýyldyq densaýlyq saqtaýdy jańǵyrtý» ulttyq jobasy aıasynda 36 aýylda medıtsınalyq nysannyń qurylysy aıaqtalady. Ulan aýdanynda bir aýysymda 150 adam qabyldaıtyn zamanaýı aýdandyq emhana ashyldy. Rıdderde aýrýhana kesheniniń qurylysy aıaqtalýǵa jaqyn.

Al Óskemende Ana men bala ortalyǵy jáne Gematologııa ortalyǵyn biriktiretin zamanaýı medıtsınalyq klaster qurylysy bastaldy. Memlekettik-jekeshelik áriptestik tetigi arqyly Nefrologııa ortalyǵyn qurý josparlanǵan.

Medıtsına qyzmetkerleriniń biliktiligin arttyrý jumystary jalǵasady. Bıyl 118 maman oqytyldy, onyń ishinde 72 maman Túrkııa, Izraıl, Germanııa, Qytaı jáne basqa elderdiń jetekshi medıtsınalyq ortalyqtarynda taǵylymdamadan ótken.

— Bizdiń ýnıversıtet ǵalymdary Ulttyq travmatologııa jáne ortopedııa ortalyǵymen birlesip, ımplanttyń 6 túrin jasap shyǵardy. Omyrtqa aralyq keıdj jáne plastına ornatý boıynsha 137 ota jasaldy. Qazaq onkologııa jáne radıologııa ınstıtýtymen birlesip, onkologııalyq aýrýlardy emdeýge arnalǵan tıtan untaǵynan ımplantattar jasalyp jatyr, — dedi Nurymbet Saqtaǵanov.

Buǵan deıin Nurymbet Saqtaǵanov Zaısan men Qatonqaraǵaıdaǵy jańa áýejaılar qashan ashylatynyn aıtqan edi.