Óskemende tıtan-magnıı kombınatynyń qubyry jarylyp, jerdiń aq túske boıalýyna qatysty tekserý júrgizildi

ÓSKEMEN. QazAqparat – Óskemen qalasynda tıtan-magnıı kombınatynyń qubyry jarylyp, jerdiń sút sııaqty appaq túske boıýlanýyna qatysty tekserý júrgizildi, dep habarlaıdy QazAqparat tilshisi.

ShQO Ekologııa departamenti baspasóz qyzmetiniń málimetine súıensek, áleýmettik jelide «Óskemen tıtan-magnıı kombınaty» AQ qubyrynyń jarylyp, sonyń saldarynan jerdiń sút sııaqty appaq tústi suıyq qaldyqtarmen lastanǵany jaıly vıdeo tarady. Soǵan oraı mamandar arnaıy tekserý júrgizgen.

«Anyqtalǵandaı, kombınattyń qaldyq jınaǵyshy qubyrynyń bir bóligi jarylyp, sol kúni birden qalypqa keltirilgen. Al odan tógilgen suıyqtyqtyń appaq tústi bolýy onyń quramynda aýyr metaldardy beıtaraptandyratyn ákti súttiń qosylýyna baılanysty. Sýdy tazartýdyń bul tehnologııasy barlyq metallýrgııalyq zaýyttarda qoldanylady», - delingen aqparatta.

Qazirgi ýaqytta ýchaskede aýmaqty tazartý jumystary aıaqtaldy. Qorshaǵan eshqandaı zalal keltirilgen joq.