Óskemende terek mamyǵy garaj ben eki kóliktiń órtenýine sebepshi boldy
NUR-SULTAN. QazAqparat – Tótenshe jaǵdaılar departamentiniń ókilderi terek mamyǵynyń janýynyń 18 jaǵdaıyn anyqtady. Bul týraly órt qaýipsizdigi sharalary jáne balalardyń terezeden qulaý faktileri boıynsha ótken onlaın brıfıngte aıtyldy, dep habarlaıdy QazAqparat tilshisi.
«Qazir terek mamyqtarynyń janý faktileri jıilep ketti. Qazir terek aǵashtarynyń gúldenip jatqan kezi. Osyǵan qaraı terek mamyǵy janýynyń 18 jaǵdaı tirkeldi. Janǵan aýmaq 104 sharshy metrdi qurady», - deıdi Nur-Sultan qalasy TJD basqarma bastyǵynyń mindetin atqarýshy Erkin Otarǵalymuly.
Onyń aıtýynsha, keshe Óskemen qalasynda terek mamyǵynyń janýy saldarynan garaj ben onyń ishindegi eki avtokólik órtenip ketken.
«Osyndaı máseleniń aldyn alý maqsatynda elordalyq Tótenshe jaǵdaılar departamentiniń ókilderi turǵyndarǵa birqatar keńes beredi. Birinshiden, otty paıdalanǵan kezde qaýipsizdik erejelerin saqtaý kerek. Ekinshiden, jasóspirimderdiń sirińkemen terek mamyqtaryn jaǵý faktileriniń aldyn alý kerek. Úshinshiden, terek mamyǵy kóp shoǵyrlanǵan saıajaı, jer úılerdiń mańynda tazalyq jumystaryn jıi júrgizip turý kerek. Qala aýmaǵynda órt qaýpi kezeńi bastalǵaly órtke qarsy qyzmet 49 ret shaqyrtý alǵan. Jalyn sharpyǵan aýmaq 10,6 myń sharshy metrdi qurady. Bul byltyrǵy kórsetkishten tómen, degenmen qaýipsizdik erejelerin saqtaýǵa asa mán bergen durys», - deıdi ol.
