Óskemende tegin úı alý úshin jalǵan qujat jasatqan memqyzmetker sottaldy

ÓSKEMEN. QazAqparat – Óskemen qalasynda tegin úı alý úshin jalǵan qujat jasatqan memlekettik qyzmetker sottaldy, dep habarlaıdy QazAqparat tilshisi.

ShQO Prokýratýrasy baspasóz qyzmetiniń dereginshe, Óskemen qalalyq memlekettik kirister basqarmasynyń qyzmetkeri 2011 jyly memleketten qyzmettik páter alǵan. 2016 jyly ol úıdi jekeshelendirip almaq bolǵan.

«Qyzmetker 4,4 mln teńge kólemindegi páterdiń qaldyq qunyn tólemeý úshin turǵyn úı komıssııasyna baspanany tegin jekeshelendirý quqyǵyn beretin ekologııalyq kýálikti usyndy. Tekserý kezinde belgili bolǵandaı, jumyspen qamtý jáne áleýmettik baǵdarlamalardy úılestirý bólimi oǵan bul ekologııalyq kýálikti bermegen. Al memlekettik qyzmetker burynǵy Semeı ıadrolyq polıgonyndaǵy synaqtardan zardap shekkender sanatyna jatpaıdy», - delingen aqparatta.

Qalalyq №2 sotynyń úkimimen aıyptalýshy QR Qylmystyq Kodeksiniń 195-baby 4-bóliginiń 2-tarmaǵymen kináli dep tanyldy. Endi ol ómir baqı memlekettik qyzmette jumys isteı almaıdy. Úkim zańdy kúshine endi.

Qazirgi tańda ákimdik páterdiń qaldyq qunyn memlekettik bıýdjetke óndirý boıynsha sot protsesin júrgizýde.