Óskemende «Táýelsizdik týyn tikkender!» fotosýret kórmesi ashyldy
Óskemen qalasyndaǵy O.Bókeı atyndaǵy kitaphanada «Táýelsizdik týyn tikkender!» fotosýret kórmesi ashyldy, dep habarlaıdy Kazinform.
Kórmege arqaý etilgen fotosýretter shyǵysqazaqstandyq jeltoqsanshylar syıǵa bergen kitapqa súıenip shyǵarylǵan.
- Bul kitapty árkim alyp oqı bermeıtindikten kelýshilerge fotosýret arqyly kórsetip tanystyrý maqsat etildi. Kórmede Jeltoqsan kóterilisine shyqqan qaısar minezdi qaıratkerlerdiń sýretteri, ómirbaıandary berilip, olar týraly jazylǵan kitaptar, gazetter men jýrnaldar toptastyrylǵan, - deıdi O.Bókeı atyndaǵy kitaphana dırektorynyń orynbasary Janat Jıenbekova.
Qala halqy qazirgi zamannyń batyrlarymen jaqyn tanysyp, sol bir qıyn zamattyń tynys-tirshiligine boılaı alady.
- №3 mektep oqýshylary rýhanııat oshaǵyna kelip, kórmeni tamashalap ketti. Olar kórmege qoıylǵan fotosýretterdegi tyń aqparattardy smartfondaǵy gýgl-aýdarmashy arqyly birneshe tilde oqı aldy. «Táýelsizdik týyn tikkender!» kórmesi 28 jeltoqsanǵa deıin jalǵasady. Tarıhymyzdy tanytatyn kórmeden qapy qalmańyzdar. Sizderge esigimiz árdaıym ashyq!, - deıdi J.Jıenbekova.
