Óskemende Táýelsizdik kúni qarsańynda áleýmettik nysandar ashyldy

ÓSKEMEN. QazAqparat – Óskemen qalasynda Táýelsizdik kúni qarsańynda áleýmettik nysandar ashyldy, dep habarlaıdy QazAqparat tilshisi.

Búgin Óskemendegi M.Shaıahmetov atyndaǵy №23 orta mektepte ınklıýzıvti bilim berý kabınetiniń saltanatty ashylýy ótti. Bilim ordasynda bir jarym myńnan astam oqýshy bar bolsa, onyń 31-i erekshe bilim berýdi qajet etedi.

Joba Dara qaıyrymdylyq qorynyń qoldaýymen júzege asyrylǵan. Kabınet ınklıýzıvti bilim berý salasyndaǵy ǵylymnyń sońǵy tendentsııalaryna sáıkes jabdyqtalǵan. Onyń ashylý saltanatyna Óskemen qalasynyń ákimi Jaqsylyq Omar qatysty.

«Jyl saıyn qalada ınklıýzıvti bilim berý kabınetteri kóbeıip kele jatyr. Sebebi erekshe qajettilikteri bar balalar áleýmetten shetkeri qalmaýy kerek. Kabınette balalar psıholog, logoped jáne defektologtyń kómegin ala alady», - dedi ol.

Budan bólek, aıtaýly mereke qarsańynda Ertis City turǵyn úı kesheninde jańa balabaqsha paıdalanýǵa berildi. Shaǵyn aýdan halqyn mektepke deıingi bilim berý mekemesiniń jetispeýshiligi burynnan beri tolǵandyryp kele jatqan edi. «Baldáýren» balabaqshasynda 170 oryndyq jeti top bolmaq. Balabaqsha jıhazben jáne barlyq qajetti qural-jabdyqtarmen jabdyqtalǵan.