Óskemende tatýlasý ortalyǵy ashyldy
ÓSKEMEN. QazAqparat - Janjal men daýlar tek sotta sheshiledi degen pikir bar. Alaıda, álemdegi sot tóreliginiń basty qaǵıdasy – daýlasýshy ek jaqty ymyraǵa keltirý. Osylaısha, damyǵan elderde janjaldardyń 90 paıyzy sottan tys sheshiledi, dep habarlaıdy ShQO aqparat ortalyǵy.
Shyǵys Qazaqstanda sońǵy jyldary tatýlastyrý rásimderin damytý úshin qoldan kelgen barlyq amaldar jasalýda. Máselen, medıatsııa ortalyqtary men kabınetteri tabysty jumys isteýde, al oblys sottary tatýlasý salasynda 3 jyldan beri kóshbasshy bolyp keledi. Іsterdiń 22 paıyzdan astamy tatýlastyrý rásimderimen aıaqtalǵan. Ótken jyly 5,5 myńnan astam isti retteýge qol jetkizildi.
Osy rette, Óskemende tatýlasý Ortalyǵynyń ashylýy Tatýlasý jáne medıatsııa ınstıtýtyn damytýdyń jalǵasy jáne janjaldardy beıbit jolmen sheshýge jáne otbasylyq, eńbek qatynastaryn saqtaýǵa jasalǵan úlken qadam boldy.
ShQO ákimi Danıal Ahmetov ortalyqtyń ashylýyna qatysyp, onyń jumysymen tanysty.
«Ókinishke oraı, sońǵy ýaqytta elimizde jáne bizdiń oblysta ajyrasý oqıǵalary jıilep bara jatqanyn kórip otyrmyz. Sondyqtan azamattyq qoǵam jaǵdaıynda bitimgershilik rásimderge baǵyttalǵan barlyq ádister mańyzdy. Tatýlasý ortalyǵy jaqsy nátıje beredi dep úmittenemin, óıtkeni, otbasy – memleket negizi. Sondyqtan otbasy qundylyqtaryn saqtaýymyz kerek. Jalpy, ortalyq óte jaıly, jaryq. Qyzmetterińizdiń jemisti bolýyn tileımin», - dedi Danıal Ahmetov.
Tatýlasý ortalyǵynda 2 psıholog jáne 3 medıator jumys isteıdi. Sonymen qatar, munda daýlardy sheshý úshin qolaıly jaǵdaı jasalǵan dıalog alańy quryldy.
«Qazir sottasatyn emes, tatýlasatyn zaman» degen uǵym bar. Medıatsııa tártibimen jasalǵan kelisim, sot sheshimimen jasalǵan kelisim sııaqty daýdy túpkilikti sheshe alady. Osy joldy tańdaı otyryp, taraptar táýelsiz medıatorǵa júginedi, ol sharttar men jaǵdaıdy taldaý arqyly jaǵdaıdy sheshýdiń bir nemese birneshe ońtaıly nusqalaryn usynady.
Sot isi memlekettik baj tóleý, advokat jaldaý, ýaqyt jumsaýdy talap etedi. Sondaı-aq, ádette, taraptardyń bireýi sot sheshimine narazy bolyp jatady. Al, tatýlasý ádisi qarym – qatynasty, iskerlik baılanysty, densaýlyqty, aqsha men ýaqytty joǵaltpaýǵa múmkindik beredi», - dedi Shyǵys Qazaqstan oblystyq sotynyń tóraǵasy Nurlan Qaıyrbekov.
Tatýlasý ortalyǵynyń medıatorlary men psıhologtary tek otbasy ǵana emes, eńbek, azamattyq qatynastar, bank jáne saqtandyrý salasyndaǵy daýlardy da sheshetin bolady. Sondaı-aq, avtorlyq quqyq pen zııatkerlik menshikke qatysty daýlardy sheshýge de kómektesedi. Aıta keteıik, mundaı ortalyqtar Altaı jáne Jarma aýdandarynda tabysty jumys isteýde.
«Sotta talapker jáne jaýapker bolady. Nátıjesinde olardyń bireýi jeńedi, sáıkesinshe ekinshi jaq narazylyq tanytady. Dál osyndaı jaǵdaıda eki jaqtyń da kóńilinen shyǵatyn sheshim qabyldaý qajettiligi týyndaıdy. Tatýlasý qadamy kez-kelgen jaǵdaıdy sot arqyly sheshýden góri áldeqaıda tıimdi. Ortalyqtyń jumysy halyq arasyndaǵy qaqtyǵys deńgeıin aıtarlyqtaı tómendetedi, quqyqtyq mádenıetti arttyrýǵa yqpal etedi, daýlardy sotqa deıin retteýdi dáripteıdi», – dep atap ótti Nurlan Qaıyrbekov.
Aıta keteıik, tatýlasý ortalyǵy Óskemende Býrov kóshesi, 20, mekenjaıynda ornalasqan, al oblys turǵyndaryna qyzmet tegin kórsetiledi.
