Óskemende tasqynnyń saldaryn joıýǵa qatysqandar marapattaldy
ÓSKEMEN. QazAqparat - Óskemen qalasynyń ákimi Qýat Tumabaev tasqyn kezinde apat saldaryn joıýǵa belsendi atsalysqan turǵyndardy marapattady, dep habarlaıdy QazAqparat tilshisi.
Tasqyn kezinde oblys ortalyǵynda 72 úıdi sý alyp, 178 aýla búlingen bolatyn.
«Tabıǵı apatty kóptiń kómegimen ǵana eńsere aldyq. Qarapaıym turǵyndardyń qutqarýshylarmen qanattasa júrip kómek kórsetkenin kórdik» - deıdi Qýat Tumabaev.
Onyń aıtýynsha №5518 áskerı bóliminiń 100-den astam sarbazy Ahmer, Sogra, Menovnoe, Shmelev log eldi mekenderin sý alǵan kezde jankeshtilikpen eńbek etken.
Alǵys arqalaǵandar arasynda oblystyq «Halıfa Altaı» meshitiniń ujymy da bar. Olar tasqynnan zardap shekken turǵyndarǵa 10 tonnadan astam azyq-túlik jınap bergen. Apat bolǵan eldi meken turǵyndaryna kıim-keshek pen azyq-túlik jınaıtyn beket uıymdastyrǵan «Nur Otan» partııasynyń qalalyq fılıaly da ákim qolynan alǵyshat aldy.
