Óskemende taǵy da apat bolyp, 2000-ǵa jýyq turǵyn úı jaryqsyz qaldy
ÓSKEMEN. KAZINFORM — Óskemende 13 sáýir keshki ýaqytta kezekti apatty jaǵdaı bolyp, JMK shaǵyn aýdanynyń taǵy birneshe kóshesinde elektr energııasy óshirildi.
Bul sońǵy kúnderdegi alǵashqy jaǵdaı emes. Búgin tańerteń osy shaǵyn aýdanda shamamen 2,5 myń abonent jaryqsyz qalǵan bolatyn.
Bir apat tolyq joıylmaı jatyp, ekinshisi tirkeldi. «BESK» AQ málimetinshe, apat 17:39–da «KShT» 110/10 kV qosalqy stantsııasynda bolǵan.
— 13 sáýir kúni keshki ýaqytta qolaısyz aýa raıy jaǵdaıyna baılanysty «KShT» qosalqy stantsııasynda L-44 jelisi apatty túrde ajyratyldy. Sonyń saldarynan JMK shaǵyn aýdanynyń tutynýshylary — Sátbaev dańǵyly, Ótepov jáne Jastar kósheleriniń turǵyndary, jalpy sany shamamen 2000 abonent jaryqsyz qaldy. Qazirgi ýaqytta arnaıy brıgada jóndeý jumystaryn júrgizip jatyr, — dep habarlady kompanııanyń baspasóz qyzmetinen.
Eske salsaq, osyǵan deıin Óskemende 5 myńǵa jýyq abonent jaryqsyz qalǵany habarlanǵan.
