Óskemende taǵdyr tálkegine ushyraǵan áıelge páter berildi
ÓSKEMEN. QazAqparat - Byltyrǵy jyly Daýn sındromyna shaldyqqan uly iz-tússiz joǵalyp ketken jarymjan Zámzágúl Qusaıynovaǵa oblys ortalyǵynyń ákimdigi páter berdi, dep habarlaıdy «QazAqparat» HAA tilshisi.
Óskemen qalasy turǵyndarynyń kóbi onyń aýyr taǵdyrynan habardar. Kózi kórmeıtin Zámzágúl tastap ketken eski úıde stýdent qyzy jáne múgedek ulymen birge turdy. Byltyrǵy jyldyń maýsym aıynda uly iz-tússiz joǵalyp, áli kúnge deıin onyń taǵdyry beımálim kúıde qalyp otyr. Zámzágúl ınsýlt alyp, júregine ota da jasaldy. Taıaýda ǵana ol turmys jaǵdaıyn jeńildetýge kómek surap, qala ákimi Qýat Tumabaevtyń qabyldaýyna keldi.
«Birneshe saǵat buryn Zámzágúl Qusaıynova ákimdik esebinen jóndeý jumystary júrgizilgen páterge kóshirildi. Endi ol turǵyn úı kezegindegi memleketten bólinetin páterin alǵansha qyzymen osy páterde turady. Páterdiń terezeleri syrlanyp, jańa lınoleým tóselip, tusqaǵazdar jabystyryldy. Úı jıhazdary men turmystyq tehnıkalar satylyp alyndy», - dedi ákimdiktiń baspasóz qyzmeti. Jaıly úıge kóshirilgen áıel qýanyshtan jylap jiberdi. Onyń aıtýynsha, endigi armany ulyn taýyp, jańa páterge alyp kelý.
