Óskemende sýmen jabdyqtaý júıesi apatty túrde óshirilip, 40 myńnan astam abonent sýsyz qaldy

ÓSKEMEN. KAZINFORM – Óskemen qalasynda sýmen jabdyqtaý júıesi apatty túrde óshirilip, 40 myńnan astam abonent sýsyz otyr.

Belgili bolǵandaı, búgin tańerteń «Pıoner» sý jınaǵyshynda jáne Myzy aýdanyndaǵy sorǵy stantsııasynda elektr energııasy ajyratylǵan. Sonyń saldarynan qalanyń birqatar bóliginde aýyzsý berý apatty túrde toqtatyldy. Barlyǵy 40 myńnan astam abonent sýsyz qalǵan.

Onyń qatarynda Áýezov, Jeńis dańǵyldary, Qaısenov, Krylov, Toqtarov, Lıbneht, Lıharev, Gorkıı, Beıbitshilik, Chehov, Qazaqstan, Qabanbaı batyr, Novatorov, Nurmaǵambetov, Tolstoı, Protozanov, Permıtın, Býrov, Myzy kósheleri, Slavskıı atyndaǵy jaǵalaý, Krasına jáne Shmelev log kentteriniń turǵyndary bar.

Sonymen qatar 11 mektep pen 13 balabaqsha sýsyz qalyp otyr.

Qala ákimdiginiń málimetinshe, qazir sý jınaǵysh qaıta iske qosyldy. Onda sý jınalyp, júıe birtindep standartty qysym deńgeıine deıin kóterilip keledi.

Eske salsaq, osyǵan deıin Óskemende elektr jelilerindegi apat saldary joıylyp, úılerge jylý berilgeni habarlanǵan.