Óskemende sýǵa batyp bara jatqan 5 jasar balany stýdent qutqaryp qaldy

ÓSKEMEN. KAZINFORM – Óskemen qalasynda ata-anasynyń qaraýynsyz qalǵan búldirshin sýǵa aǵyp kete jazdady.

ShQO Tótenshe jaǵdaılar departamentiniń málimetine súıensek, oqıǵa qaladaǵy Úlbi ózeninde bolǵan. Erasyl Omarhanov sýǵa batyp bara jatqan balany kezdeısoq kórip qalyp, dereý kómekke umtylǵan. Osylaısha, ol syn saǵatta abdyrap qalmaı, qarshadaı balany ajaldan arashalap qaldy.

- Belgili bolǵandaı, búldirshin ápkesimen ózen jaǵasynda oınap júrgen. Kenet sýǵa qulap, aǵyn ony alyp kete jóneldi. Erasyl der kezinde kómekke kelip jetken, - delingen aqparatta.

Erasyl Omarhanov Óskemendegi Qazaqstan-Amerıkalyq Erkin ýnıversıtetiniń stýdenti.

- Ózimdi erlik jasadym dep sanamaımyn. Meniń ornymda bolsa kez kelgen adam osylaı ister edi, - deıdi ol.

Osy rette, ShQO TJD ata-analardan balalaryn sý jaǵasynda qaraýsyz qaldyrmaýdy suraıdy.

Eske salsaq, osyǵan deıin Pavlodarda órt sóndirýshilerdiń jalyn ishinen 3 balany qutqarǵany jaıly jazǵanbyz.