Óskemende sýǵa batyp bara jatqan 5 jasar balany qutqarǵan stýdent marapattaldy

ÓSKEMEN. KAZINFORM – Óskemende ata-anasynyń qaraýynsyz qalǵan búldirshindi aman alyp qalǵan Erasyl Omarhanov marapattaldy.

Úlbi ózeninde batyp bara jatqan balany aman alyp qalǵan Erasyl Omarhanovpen Óskemen qalasynyń ákimi Almat Aqyshov kezdesti. Beıbit kúnniń batyry búginde Qazaqstan-Amerıkandyq Erkin ýnıversıtetinde «Psıhologııa» mamandyǵynda bilim alyp jatyr. 

Erasyldyń batyldyǵy, tabandylyǵy jáne ózgege kómek kórsetýge degen shynaıy nıeti zor qurmetke laıyq. Osyndaı sanaly, júregi keń, elge janashyr jastarymyzdyń bar ekeni qýantady. Erasyldyń bul ónegeli isi ózgelerge úlgi bolyp, qoǵamda meıirim men jaýapkershilikti arttyra túsetinine senimdimin, - dedi Almat Aqyshov.

Ákim Erasyl Omarhanovqa Alǵys hat pen aqshalaı syılyq tabystady. Sonymen qatar «AN Group» kompanııasy 2-shi kýrsta oqyp jatqan stýdenttiń qalǵan oqý aqysyn tólep beretindikterin jetkizdi.

- Óz áreketimdi erlik dep sanamaımyn. Mundaı jaǵdaıda ár azamat dál osylaı kómekke kelýi tıis dep esepteımin, - dedi Erasyl.

Eske salsaq, buǵan deıin Óskemende sýǵa batyp bara jatqan 5 jasar balany stýdent qutqaryp qalǵany jaıly jazǵanbyz.