Óskemende sýǵa aǵyp kete jazdaǵan jigit qutqaryldy
ÓSKEMEN. QazAqparat - 24 jastaǵy óskemendik shomylý maýsymynyń ashylýyn kútpesten Ertiske túsken. Et qyzýmen ózenniń ortasyna jetkende aǵysqa tótep bere almaı qalǵan «júzgishti» qutqarýshylar jaǵaǵa jetkizdi, dep habarlaıdy QazAqparat tilshisi.
Ertistiń qarqyny qatty bolǵany sonshalyq, jigitti júzdegen metrge aǵyzyp áketken. Tek qalqyma kópirden asqan kezde baryp, ózen ortasyndaǵy tómpeshikke shyǵyp, aman qalǵan. Sý ortasynda jartylaı jalańash otyrǵan jigitti kópirden ótip bara jatqan adamdar baıqap, «112»-ge habarlasady.
«Dabylǵa jaǵajaılardy qaıyqpen patrýldep júrgen №5 jasaq birinshi bolyp ún qatty. Jaǵaǵa aman jetken jigit kıim-keshegi men uıaly telefonyn joǵaltyp alǵan. Kıimsiz qalǵan jigitti qutqarýshylar úıine jetkizip saldy. Onyń sý túspes buryn araq ishkeni anyqtaldy», - delingen oblystyq tótenshe jaǵdaılar departamenti taratqan málimette.
Mamandar jigittiń aman qalýyn myńnan bir kezdesetin kezdeısoqtyq dep baǵalap otyr.
