Óskemende sý tasqyny qaýpi bar ýchaskelerge tekserý júrgizildi
ÓSKEMEN. QazAqparat – QR ІІM Tótenshe jaǵdaılar komıteti tóraǵasynyń birinshi orynbasary Marat Kúldikov Óskemen qalasyna is-saparmen kelip, sý tasqyny qaýpi bar ýchaskelerdi aralady, dep habarlaıdy QazAqparat.
«Shara barysynda Solnechnyı kentindegi sý jınaǵysh toǵandy, jaǵalaýlardy bekitý jumystary júrgizilgen Mahovka ózeni men Bezymıannyı klıých aryǵyna monıtorıng júrgizildi. Sondaı-aq Ahmer kenti men 22-shi shaǵynaýdanda sý tasqynyna qarsy atqarylyp jatqan is-sharalar tekserildi», - dep habarlady ShQO Tótenshe jaǵdaılar departamentiniń baspasóz qyzmeti.
Tekserý qorytyndysy boıynsha tasqyn qaýpi bar ýchaskelerdegi qosymsha jumystar legi belgilendi. Qutqarýshylar sý basýy múmkin turǵyn úılerdi aralaýdy jalǵastyrýda. Úı ıelerine tasqyn kezindegi is-qımyl erejeleri jiti túsindirilýde.
Esterińizge sala ketsek, osyǵan deıin Shyǵys Qazaqstanda 364 shaqyrym arnalar men aryqtardyń qardan tazartylǵanyn habarlaǵan bolatynbyz.
