Óskemende sý qubyrynyń tesilýinen turǵyn úılerdiń qabyrǵalary jarylyp jatyr
ÓSKEMEN. KAZINFORM – Óskemen qalasyndaǵy Zaşıta shaǵyn aýdanyndaǵy birneshe jer úıdiń qabyrǵalarynda jaryq paıda boldy. Turǵyndardyń aıtýynsha, buǵan kommýnaldyq jelilerdegi apat áser etken.
Áleýmettik jelide jarııalanǵan vıdeolarda úı qabyrǵasyndaǵy jaryqtar baıqalady. Katonqaraǵaı kóshesiniń turǵyndary mundaı jaryqtar bir emes, birneshe úıde paıda bolǵanyn alǵa tartyp otyr.
Keıbir turǵyndardyń aıtýynsha, jaryqtar ýaqyt ótken saıyn ulǵaıyp barady. Olar buǵan sý qubyry jelilerindegi kommýnaldyq apat sebep bolýy múmkin dep boljaıdy. Buǵan deıin úılerdiń mańynda sýǵa tolǵan shuńqyr paıda bolǵan.
Óskemen qalasynyń ákimi Almat Aqyshov oqıǵa ornyna baryp, zaqymdanǵan úılerdi qarap shyqty.
– Úılerge tolyq tehnıkalyq tekserý júrgizip, olardyń qazirgi jaǵdaıyn baǵalaý qajet. Arnaıy komıssııa qysqa merzimde tıisti qorytyndy jasaýy tıis, – dedi qala basshysy.
Onyń aıtýynsha, qazir zaqymdanǵan úılerdiń birinde turý qaýipti bolýy múmkin. Qalalyq ákimdikten tehnıkalyq tekserý aıaqtalǵannan keıin ary qaraı qandaı sharalar qabyldanatyny jóninde sheshim qabyldanatynyn habarlady.
Eske salsaq, osyǵan deıin Oralda apatty úıi súrilgen turǵyndar nelikten baspana ala almaı otyrǵany jaıly jazǵanbyz.
