Óskemende sý qubyrynda apat bolyp, birneshe kóshe sýsyz qaldy

ÓSKEMEN. KAZINFORM – Óskemen qalasynda sý qubyrynda apat saldarynan júzdegen turǵyn úı sýyq sýsyz qaldy. 

Apat búgin tańerteń Bespalov kóshesi mańynda boldy. Dıametri 400 mm bolatyn sý qubyry jarylǵan. Sonyń saldarynan Mırnyı kenti men qalanyń birqatar kóshesinde sý joq. Atap aıtqanda, Sevastopol, Vınogradov, Mıkoıan, Karbyshev kósheleri men Nazarbaev dańǵylynyń turǵyndary sýyq sýsyz otyr.

Qazirgi ýaqytta apat bolǵan jerde jóndeý brıgadasy jumys istep jatyr. Sý berýdi qalpyna keltirý merzimi ázirge belgisiz.

– Sý qubyryn qalpyna keltirý jumystaryna baılanysty sýyq sý berý ýaqytsha toqtatyldy. Turǵyndarǵa sý tasymaldaý uıymdastyryldy. Ótinimder táýlik boıy 53-16-61 jáne 8-705-206-79-16 telefon nómirleri arqyly qabyldanady, - dep habarlady «Óskemen Vodokanal» mekemesinen.

Eske salsaq, osyǵan deıin Temirtaýda 40-qa jýyq kópqabatty úı jylýsyz qalǵany jaıly jazǵanbyz.