Óskemende sý qoımasynda úsh er adam qutqaryldy
ÓSKEMEN. QazAqparat – Óskemendegi sý qoımasynda 1986, 1989, 1990 jyldary týǵan úsh er adam qutqaryldy, dep habarlaıdy QazAqparat Shyǵys Qazaqstan oblystyq Tótenshe jaǵdaılar departamentiniń baspasóz qyzmetine silteme jasap.
6 mamyrda saǵat 23:39-da ShQO TJD-ǵa Ablaketka aılaǵy aýdanyna qaıyqpen ketken úsh er adamnyń joǵalyp ketkeni týraly habarlama kelip túsken. Oqıǵa ornyna dereý ShQO TJD Jedel-qutqarý jasaǵy jetken. Oqıǵa ornyna barǵan qutqarýshylar sýdyń betinen aýdarylǵan rezeńke qaıyq pen 1986, 1989, 1990 jyldary týǵan úsh zardap shekken adamdy tapty.
Sondaı-aq, er adamdardyń kómekke shaqyrǵan daýystaryn estip, jaqyn jerde ornalasqan «SUNRISE» rezıdentsııasynyń qyzmetkeri Edýard Lıskaýskas katerimen kelgen, ol zardap shekkenderdi «Jolbarys-Kúzet» kúzet agenttiginiń kúzetshisi Talǵat Darýbaevpen jáne qutqarýshylarmen birlesip jaǵaǵa shyǵardy. Osydan keıin aýdarylǵan qaıyqty ShQO TJM Jedel-qutqarý jasaǵynyń qyzmetkerleri jaǵaǵa jetkizgen.
Bul jaǵdaı qarapaıym qaýipsizdik sharalarynyń buzylý saldarynan bolǵan. 2 adamǵa arnalǵan qaıyqqa shamadan tys salmaq túsip, sonyń saldarynan ol sýǵa aýdarylǵan. Sondaı-aq ondaǵy úsh adam qutqarý kúrteshesin kımegen.
ShQO TJD sý aıdyndaryndaǵy qaýipsizdik sharalaryn qatań saqtaýdy eske salady.
