Óskemende street workout alańqaıy ashyldy
ASTANA. QazAqparat - Qazaqstan Ulttyq Olımpıada komıteti Óskemen qalasynda street workout alańqaıyn ashty, dep habarlaıdy QazAqparat tilshisi QR UOK-niń baspasóz qyzmetine silteme jasap.
Saltanatty sharada Bar Bars komandasy qala turǵyndaryna arnalǵan búkilqalalyq jattyǵý uıymdastyryp, alańqaıda júıeli túrde jattyǵý arqyly qandaı jetistikke jetýge bolatynyn kórsetti.
Street workout - sporttyq kóshe mádenıetin damytýdaǵy eń tanymal baǵyttardyń biri, búginde Qazaqstan UOK jobasynyń arqasynda qoljetimdi sport túrine aınaldy. UOK prezıdenti Tımýr Qulybaevtyń bastamasy men jeke qarajaty esebinen 2016 jyldan beri elimizdiń ár aımaǵynda 50-den asa mamandandyrylǵan sporttyq alańqaılar ashyldy. Atap aıtar bolsaq, Astana, Almaty, Shymkent, Qyzylorda, Taraz, Qaraǵandy, Aqtaý, Aqtóbe, Jańaózen jáne Kókshetaý qalalarynda jańa alańqaılar boı kóterdi. Jobanyń eń basty artyqshylyǵy - alańqaılardyń tek oblys ortalyqtarynda ǵana emes, oblystan shalǵaı jatqan qalalarda da ashylýynda.
«Qazaqstan UOK olımpıadalyq sport túrlerin damytýǵa jaýapty. Alaıda, buqaralyq sport báriniń túp negizinde turǵanyn esten shyǵarmaý qajet. Mundaı sporttyq alańqaılardyń ashylýy balalar men jastardyń dene shynyqtyrý men sportqa den qoıýyna sebep bolady. Ashyq aspan astyndaǵy sporttyq zonalar el turǵyndary úshin tıimdi ekenin dáleldep úlgerdi. Biz alańqaılardyń úlken suranysqa ıe ekenin, qańyrap bos qalmaıtynyn baıqadyq. Ol jerde únemi ártúrli deńgeıdegi sporttyq jarystar ótip turady. Qazirgi tańda Qazaqstan UOK ókilderi el aımaqtaryn aralaýda. Osy oraıda, biz atalǵan áleýmettik joba týraly basty jańalyqtardy bilip otyrmyz. Bul jobany ári qaraı jalǵastyra beremiz. Aldaǵy ýaqytta shalǵaıda jatqan aýyldarda da alańqaılar boı túzeıdi», - dedi Qazaqstan UOK bas hatshysy Danııar Abýlgazın.
Óskemendegi saıabaq aımaqtarynda qurylǵan tórt alańqaıdyń ashylý saltanatyna oblys basshylyǵy, Qazaqstan UOK men Qazaqstan STREET WORKOUT federatsııasynyń ókilderi qatysty. Semeıde mamandandyrylǵan alańqaılardy ashý týraly jospar jaqyn arada iske asady. Semeıdegi halyq kóp qonystanǵan aýmaqta tórt alańqaı ornalasqan.
Street workout mamandandyrylǵan alańqaılary eń paıdaly qurylǵylarmen jabdyqtalǵan. Alańqaıdaǵy qurylǵylar jabdyǵy bulshyqetterdiń barlyq toptaryn jumyldyryp, jattyǵýdyń tıimdiligin arttyrady. Atalǵan alańqaılardy ornatý arqyly turǵyndardyń sportpen múlde tegin aınalysýyna jol ashyldy. Sport alańqaılary elimizdegi qatal aýa raıyna da beıimdelgen. Bul alańqaılardyń basty ereksheligi - úlken aýyrtpalyqty kótere alatyn myqty bekitýler. Al rezınadan jasalǵan jabdyqtar jattyǵý kezinde jaraqat alý qaýpin seıiltedi.
Street workout federatsııasynyń aıtýynsha, búginde 80 myńǵa jýyq qazaqstandyq sporttyń osy túrimen shuǵyldanady.
