Óskemende sotqa jáne mektepke bomba qoıylǵany týraly habar túsip, halyq evakýatsııalandy

ÓSKEMEN. QazAqparat – Óskemen qalasynda sotqa jáne mektepke bomba qoıylǵany týraly habar túsip, halyq evakýatsııalandy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııaǵa qalalyq sot ǵımaratyna jarylǵysh zat qoıylǵandyǵy týraly habar tústi.

«6 aqpan kúni saǵat 15:50 shamasynda polıtsııaǵa habarlasqan belgisiz bireý Q.Qaısenov kóshesi, 55 mekenjaıyndaǵy qalalyq sot ǵımaratyna jarylǵysh zat qoıylǵandyǵy týraly aıtty. Oqıǵa ornyna shuǵyl túrde jedel qyzmetter kelip jetti. Qaýipsizdik maqsatynda ǵımarattan adamdar evakýatsııalandy. Qazirgi ýaqytta tekserý jumystary júrgizilip jatyr», - dep habarlady vedomstvo ókilderi.

Vedomstvo dereginshe, osydan 2 saǵat buryn qaladaǵy №11 mektepke bomba qoıylǵandyǵy týraly habar túsken. Sol jerden qyzmetkerler men oqýshylar qaýipsiz jerge kóshirildi. Áli de tekserý jumystary jalǵasýda.