Óskemende sońǵy qyryq jyl ishinde alǵash ret jańa tramvaılar qatynaıdy

ÓSKEMEN. QazAqparat – Óskemen qalasynda sońǵy qyryq jyl ishinde alǵash ret jańa tramvaılar qatynaıdy, dep habarlaıdy QazAqparat tilshisi.

Qala ákimdiginiń málimetine súıensek, jańa eki tramvaı búgin synnan ótkizildi.

«Sondaı-aq taǵy eki tramvaı ákelinip, qazir tramvaı parkinde jumysqa ázirlenip jatyr. Olar qańtardyń sońyna deıin iske qosylady. Jańa tramvaılardyń júris bóligi jetildirilgen, salonynda kondıtsıoner ornatylǵan, uıaly qurylǵylardy qýattaý múmkindigi de qarastyrylǵan. Jańa vagondar qozǵalysy shekteýli azamattardyń qajettilikterine sáıkes beıimdelgen», - deıdi qala ákimi Jaqsylyq Omar.

Onyń aıtýynsha, tramvaı jelilerin jańǵyrtý boıynsha jumys áli de jalǵasady. Parkti ary qaraı jańartýǵa qatysty sheshim alǵashqy jańa vagondardy qoldaný tájirıbesiniń negizinde qabyldanady.