Óskemende sıntetıkalyq esirtki satqan erli-zaıypty ustaldy

NUR-SULTAN. QazAqparat – Óskemen qalasynyń tártip saqshylary «Qarasora» jedel-izdestirý sharalary barysynda psıhotropty zattardy jasyryn satyp kelgen erli-zaıyptyny ustady, dep habarlaıdy QazAqparat tilshisi.

Quqyq qorǵaýshylar arnaıy shara barysynda 32 jastaǵy er adam men 29 jastaǵy áıeldi qolǵa túsirgen. Olar osy jyldyń qyrkúıek aıynyń basynda Nur-Sultan qalasynan Óskemenge kelip, psıhotropty zattardy sata bastaǵan. Tergeý nusqasyna sáıkes, kúdiktiler sıntetıkalyq psıhotropty zattardyń partııasyn kólemdi kúıde satyp alyp, shaǵyn dozaǵa bólip, jasyryn qýystar arqyly ótkizip otyrǵan.

«Tintý barysynda kúdiktilerden 150 gramm bolatyn psıhotropty zat tabyldy. Bul – 500 rettik dozaǵa teń. Olardyń baǵasy qara naryqta 4 mıllıon teńgege deıin jetedi. Sonymen birge quqyq qorǵaýshylar dozalardy qaptaýǵa jáne ólsheýge arnalǵan qurylǵylardy taýyp aldy», - dep habarlaıdy ShQO PD bastyǵy Saǵat Mádıev.

Kúdiktiler ýaqytsha oqshaýlaǵyshqa qamalǵan. Qylmystyq kodekstiń 297-baby (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha sotqa deıingi tergeý amaldary bastalǵan. Kúdiktilerdiń aıyby rastalǵan jaǵdaıda olar 15 jylǵa deıin bas bostandyǵynan aıyrylýy múmkin.