Óskemende shaıbaly hokkeıden ІMM kýbogy bastaldy
ÓSKEMEN. KAZINFORM – Óskemen qalasynda ishki ister organdary qyzmetkerleri arasynda shaıbaly hokkeıden Qazaqstan Respýblıkasy Іshki ister mınıstriniń kýbogyna arnalǵan respýblıkalyq týrnırdiń saltanatty ashylý rásimi ótti.
Óskemen muz aıdyny úshinshi jyl qatarynan elimizdiń ár óńirinen kelgen tártip saqshylaryn biriktirip, hokkeı boıynsha tartysty básekeniń ortalyǵyna aınaldy. Bıyl da Shyǵys Qazaqstan oblysy qatysýshylar men jankúıerlerge qonaqjaılylyq tanytty.
Týrnırge 6 komanda qatysady. Olardyń qatarynda Astana qalasy, Qaraǵandy, Qostanaı jáne Soltústik Qazaqstan oblystarynyń quramalary, QR ІІM Kúzet qyzmetin baqylaý komıtetiniń komandasy jáne jarys ıeleri – ShQO Polıtsııa departamentiniń komandasy bar.
Ashylý saltanaty joǵary deńgeıde ótti. Muz aıdynynda jas mánerlep syrǵanaýshylardyń kórsetilimderi men patrıottyq baǵyttaǵy óner nómirleri kórermenderdiń nazaryn aýdardy. Sonymen qatar № 35 orta mekteptiń «Jas saqshy» synybynyń oqýshylary da sharaǵa qatysyp, urpaqtar sabaqtastyǵyn kórsetti.
ShQO polıtsııa departamenti bastyǵynyń mindetin ýaqytsha atqarýshy Bolat Nurseıitov týrnırdiń mańyzdylyǵyna toqtalyp, quttyqtaý sóz sóıledi.
– Hokkeı – batyldyqty, tártipti jáne shapshań sheshim qabyldaı bilýdi talap etetin sport túri. Bul qasıetter polıtsııa qyzmetiniń de negizi. Týrnırge qatysý – óz bólimshesi men óńir namysyn qorǵaý degen sóz, - dedi ol.
Jankúıerlerdiń qoldaýy, oıynshylardyń joǵary rýhy jáne uıymdastyrý sapasy týrnırdiń ashylýyn erekshe oqıǵaǵa aınaldyrdy.
Eske sala keteıik, budan buryn shaıbaly hokkeıden Qazaqstan jasóspirimder quramasy IA dıvızıondaǵy úshinshi oıynyn Ýkraınaǵa qarsy ótkizip, jeńiske jetkenin habarlaǵanbyz.