Óskemende shaýrmadan ýlanǵan 7 adam aýrýhanaǵa tústi
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, Óskemende stafılokokk ınfektsııasy bar shaýrmany jegen 7 adam ýlanyp, aýrýhanaǵa túsken. Olar shaýrmany qala kósheleriniń birinde turǵan pavılonnan satyp alǵan.
«Departamentke bir táýlik ishinde birdeı belgilermen aýrýhanaǵa túskender týraly jeti jedel habarlama jetti. Barlyǵy jıi qusyp, dene qyzýy kóterilip, úlken dáretke kóp bardy. Klınıkalyq derekter negizinde dárigerler barlyq naýqasqa «tamaqtan ýlaný» dıagnozyn qoıdy», - delingen aqparatta.
5 adam aýrýhanaǵa jatqyzylsa, ekeýi ambýlatorlyq em qabyldady. Qazirge ýaqytta patsıentter tolyqtaı jazylyp shyqqan.
«Júrgizilgen epıdemıologııalyq tekserý barysynda anyqtalǵandaı, barlyq ýlaný jaǵdaıy Óskemendegi fastfýd nysanynan satyp alynǵan shaýrmadan bolǵan. Sol pavılon ónimderin tekserý nátıjesinde shaýrma synamasynan «S.aureus 2*103 KOE/g» anyqtaldy. Bul stafılokokk ınfektsııasy. Ónimde stafılokokktyń qaıdan paıda bolǵany belgisiz. Pavılon qyzmetkerlerinen atalǵan ınfektsııa tabylmady», - deıdi departament basshysy Ǵalymbek Alın.
Degenmen fastfýd nysany jumysynan basqa buzýshylyqtar tirkeldi. Atap aıtqanda, ónimderdi tasymaldaý sharttary saqtalmaǵan, tamaq ónimderiniń qaýipsizdigin rastaıtyn ilespe qujattar bolmaǵan, pavılon ishinde jándikter júrgen. Dezınsektsııalaý jáne deratızatsııalaý jumystary júrgizilgenin rastaıtyn qujat ta joq bolyp shyqty. Kásip ıesi atalǵan buzýshylyqtarǵa joıýǵa mindetteldi. Tek sodan keıin ǵana nysan jumysyn jalǵastyra alady.