Óskemende senatorlar qylmystyq zańnamany qoldaný máselelerin qarady
ASTANA. QazAqparat - Búgin Óskemende Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń kóshpeli otyrysy boldy. Onda jańa Qylmystyq, Qylmystyq-atqarý kodeksterin qoldaný máseleleri qaraldy.
Otyrysqa oblys basshylyǵy, Bas prokýrordyń birinshi orynbasary I.Merkel, Ulttyq qaýipsizdik komıteti tóraǵasynyń birinshi orynbasary S. Ábish, ishki ister mınıstriniń orynbasary R.Jaqypov, ádilet mınıstriniń orynbasary Z.Baımoldına, basqa memlekettik organdardyń ókilderi, sondaı-aq sheteldik áriptester retinde IRZ jobalarynyń menedjeri A.Výkkert pen Drezden qalasynyń prokýrory K.Shraıtter-Skvortsova qatysty.
Otyrysty asha kelip komıtet tóraǵasy Serik Aqylbaı 2014 jyly qabyldanǵan jańa kodekster jeke adam quqyqtaryn qorǵaýdyń konstıtýtsııalyq kepildikterin kúsheıtý, ádiletti sot óndirisi men quqyqtyq jaýaptylyq sharalaryn qamtamasyz etý maqsatynda ázirlengenin atap ótti.
Jańadan qabyldanǵan Qylmystyq jáne Qylmystyq-protsestik kodekstermen qylmystyq jazany taǵaıyndaý barysyndaǵy qadamdar ózgertildi, bitistirý rásimderi, jolyn kesýdiń balama sharalaryn qoldaný múmkindigi qarastyryldy, qylmystyq isti qozǵaý satysynan bastap adam quqyqtaryn qorǵaý protsesinde óskeleń tetikter engizildi. Jańa Qylmystyq-atqarý kodeksimen sottalǵandardy túzelý dárejesine baılanysty ustaý jaǵdaıyn naqty jikteý belgilendi. Sottalǵandardyń negizgi quqyqtary men mekeme ákimshiliginiń mindetteri alǵash ret kodeks deńgeıinde bekitildi.
S.Aqylbaı bastalǵan reformalardyń is júzinde durystyǵyn atap ótti. Jańarǵan qylmystyq zańnama jaǵdaıynda tergeý jáne sot organdaryna aýyrtpalyqty eleýli túrde azaıtatyn, protseske qatysýshylardyń quqyqtary men múddelerin qorǵaý kepildikterin qamtamasyz etýge múmkindik beretin jańa quqyqtyq jáne protsestik ınstıtýttar nátıjeli jumys istep keledi.
Tutas alǵanda, qabyldanǵan ózgerister demokratııalyq, quqyqtyq memleketter sıpattaryna jaýap beretin qylmystyq júıeni qalyptastyrýǵa baǵyttalǵan, dep atap ótti senator.
Bas prokýrordyń birinshi orynbasary Iogan Merkel, ishki ister mınıstriniń orynbasary Rashıd Jaqypov, oblystyq sottyń, prokýratýranyń, Shyǵys Qazaqstan oblysynyń ishki ister departamentiniń basshylyǵy baıandama jasady.
Otyrys barysynda qylmystyq sot óndirisi, protsestik kelisim, bes býyndy sot júıesinen úsh býynǵa kóshý aıasynda jáne basqa da máseleler jónindegi tergeý sýdıasynyń, protsestiń prokýrordyń rólin talqylaýǵa erekshe nazar aýdaryldy. Sóz alǵandar sondaı-aq talqylanǵan salalar boıynsha zańnamany odan ári jetildirýge baǵyttalǵan birqatar usynystardy ortaǵa saldy.
Jańadan engizilgen jańalyqtardy birlese talqylaý quqyq qorǵaý tájirıbesinde jınaqtalǵan nátıjelerdi shynaıy taldaýǵa, qylmystyq zańnamany odan ári jetildirýdiń negizgi baǵyttaryn aıqyndaýǵa, sotqa deıingi óndiristi ońtaılandyrýǵa, onyń quqyq qorǵaý áleýetin kúsheıtýge múmkindik beredi.
