Óskemende selfı jasamaq bolǵan áıel kópirden qulap ketti
ÓSKEMEN. KAZINFORM – Óskemen qalasynda selfı jasamaq bolǵan 33 jastaǵy áıel kópirden qulap ketti.
ShQO Polıtsııa departamenti baspasóz qyzmetiniń málimetine súıensek, qala turǵyny áleýmettik jelidegi paraqshasy úshin ádemi sýret túsirgisi kelip, kópirden sýǵa qulap ketken.
«Oqıǵa 5 tamyz kúni saǵat 22.30 shamasynda Krylov kóshesinde boldy. Polıtseıler men qutqarýshylarǵa Úlbi ózeni arqyly ótetin kópirden qyzdyń qulap ketkeni týraly habar tústi. Alaıda mamandandyrylǵan qyzmetter kelgenge deıin 33 jastaǵy áıel óz kúshimen jaǵalaýǵa shyqqan», - delingen aqparatta.
Áıel adamnyń densaýlyǵy men ómirine eshqandaı qaýip tónip turǵan joq. Tártip saqshylary ony dárigerlerge tapsyrdy.
Osy rette, polıtsııa departamentiniń qyzmetkerleri halyqqa qaýipti jerlerde selfı jasamaý qajettigi týraly eskertedi.
