Óskemende saıajaı turǵyndary aýlada ot jaǵýǵa salynǵan tyıymǵa qarsy shyqty
ÓSKEMEN. KAZINFORM — Halyq saıajaıda káýáp qaqtaǵysy kelse zań boıynsha ǵımarattar men qurylystardan kem degende 10 metr qashyqtyq saqtaýy tıis. Óskemendikter bul talaptyń orynsyzdyǵyn aıtsa, qutqarýshylar tártipke baǵynbaýdyń saldary qaıǵyly jaǵdaılarǵa ákelip soǵatynyn eskertti.
Jeldi kúni ot jaǵýǵa bolmaıdy
Jaıdary jazda eldiń kóbi saıajaıǵa nemese tabıǵat aıasyna baryp demalǵandy áýes kóredi. Sol jaqta káýáp pisiretinder de az emes.
Alaıda órt qaýipsizdigi erejelerine sáıkes, mangalda ot jaǵý úshin tańdaǵan jerińiz ǵımarattar men qurylystardan kem degende 10 metr qashyqtyqta bolýǵa mindetti.
— Kóp jaǵdaıda dala órtine — qaýipsizdik erejelerin buzý jáne otty abaısyz paıdalaný sebep bolyp jatady. Ásirese saıajaılarda nemese olardyń mańynda shóp janady. Sondyqtan da jaz kezinde tótenshe jaǵdaılar qyzmeti jaǵdaıdy áýeden baqylaý úshin drondardy qoldanyp jatyr. Eger ushqyshsyz apparat bir saıajaı ıesiniń qoqys nemese shóp órtep jatqanyn anyqtasa, onda mamandar dereý sol jerge baryp, órtti qaýipsiz jaǵý erejelerin túsindiredi. Qazirgi ýaqytta qoldanystaǵy órt qaýipsizdigi erejelerinde «Aýa raıy uzaq ýaqyt boıy ystyq, qurǵaq jáne jeldi bolǵan jaǵdaıda, qalalarda, aýyldarda, kásiporyndarda, saıajaı jáne baqsha aýmaqtarynda ot jaǵýǵa, kómir, qoqys, qaldyqtar men qurǵaq shópti órteýge jol berilmeıdi, — dep habarlady ShQO tótenshe jaǵdaılar departamentinen.
Aýa raıy qolaıly bolǵan jaǵdaıda otty tek ǵımarattar men qurylystardan keminde 50 metr qashyqtyqta, arnaıy bólingen oryndarda jáne únemi baqylaýda ustap qana jaǵýǵa ruqsat beriledi.
Sonymen qatar qurǵaq ósimdikterdiń ústine, aǵashtardyń kóleńkesine, janǵysh materıaldyń astyna mangal, barbekıý nemese grıl qoıýǵa qatań tyıym salynǵan. Sondaı-aq saıajaı ýchaskelerinde nemese tabıǵat aıasynda otty óshirmeı qaldyrýǵa bolmaıdy.
— Káýápty ǵımarattar men qurylystardan keminde 10 metr qashyqtyqta ǵana pisirýge bolady. Odan keıin keminde 10 lıtrlik ydysqa quıylǵan sý nemese órt sóndirgish qural bolýy shart. Osy talaptardy buzǵandar ákimshilik jaýapkershilikke tartylady. Aýyl sharýashylyǵy jerlerinde qurǵaq shópti jaqqandar, saban órtegender jáne orman alqaptaryndaǵy órt qaýipsizdigi erejelerin saqtamaǵandar da jaýapkershilikten jaltarmaıdy. Jyl basynan beri oblysta ruqsat etilmegen jerde ot jaqqan 32 adam anyqtaldy, — delingen aqparatta.
«Halyqtyń jaǵdaıyn nege oılamaıdy?»
Alaıda bul talaptarǵa qatysty óskemendikterdiń pikiri ekige jaryldy. Biri qaýipsizdikti quptasa, ekinshileri erejeniń tym qataldyǵyn aıtty.
— Jyl saıyn jazdy tosyp júremiz. Sebebi saıajaıǵa baryp demalǵandy kóńilim súıedi. Káýáp jegendi de jaqsy kóremin. Eger men óz saıajaıymdaǵy qurylystardan 10 metr alystasam, onda kórshimniń aýlasyna tap bolamyn. Al meniń mangal ornatqan jerim betonmen jabylǵan. Sonda qaıda barýym kerek?! — deıdi Bahtııar esimdi qala turǵyny.
Al Aqyljan Mýhanovtyń aıtýynsha, ondaı qashyqtyqty saıajaıda saqtaý múmkin emes.
— Onda mangaldy kórshińniń úıiniń janynda jaǵý kerek bolady. Sebebi saıajaılar jeri — 5-6 sotyq qana. Zańdaǵy bul talaptar — aıyppul salý úshin ǵana jasalǵan sııaqty. Nege halyqtyń da jaǵdaıyn oılamasqa?! — deıdi ol.
Basty maqsat — aıyppul salý emes
Jurttyń shaǵymyna ShQO TJD baspasóz hatshysy Marına Lıskova jaýap berdi.
— Qutqarýshylardyń basty maqsaty — azamattarǵa aıyppul salý emes. Kerisinshe, órttiń aldyn alý jáne sizderdiń dúnıe-múlikterińizdi qorǵaý, — deıdi ol.
2021 jyldyń mamyr aıynda Rıdder qalasynda bolǵan alapat órt te tabıǵat aıasynda demalǵandardyń mangaldan qalǵan shoqty ormanǵa tastap ketkeninen shyqqany belgili.
Sonyń saldarynan qyzyl jalyn Leshoz eldi mekenine jaıylyp, 30 úı janyp, eki adam qaza bolǵan edi.
— Sol úshin jaýapkershilikti túsine bileıik. Zań talaptaryn buzbaıyq. Órt qaýipsizdigin saqtaý — bárimizdiń ortaq mindetimiz! , — deıdi Marına Lıskova.
Eske salsaq, osyǵan deıin Ertis boıy orman sharýashylyqtarynyń órtke qarsy áleýeti álsiz ekenin jazǵanbyz.