Óskemende saýda úıine bomba qoıylǵany týraly jalǵan habar bergen adam sottaldy
ÓSKEMEN. QazAqparat – Óskemen qalasynda saýda úıine bomba qoıylǵany týraly jalǵan habar bergen er adamnyń bas bostandyǵy 3 jylǵa shekteldi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «102» jedel arnasyna qońyraý shalǵan jigit qalanyń saýda úıleriniń birine bomba qoıylǵanyn habarlaǵan. Dereý oqıǵa ornyna arnaıy mamandar kelip jetti. Alaıda tekserýden keıin aqparattyń jalǵan ekendigi anyqtaldy.
«Tártip saqshylary kúdiktini jedel ustady. Ol Óskemen qalasynyń 21 jastaǵy turǵyny bolyp shyqty. Kýálandyrý nátıjesine sáıkes, onyń ortasha dárejedegi mas kúıde ekendigi belgili boldy», - delingen aqparatta.
Atalǵan fakti boıynsha QR QK-niń 273-babyna sáıkes sotqa deıingi tergeý júrgizilip, is sotqa joldanǵan. Qalalyq sottyń úkimimen aıyptalýshynyń 3 jylǵa bas bostandyǵy shekteldi.
