Óskemende saýda úıine bomba qoıylǵandyǵy týraly jalǵan habar bergen er adam sottaldy
ÓSKEMEN. QazAqparat – Óskemen qalasynda saýda úıine bomba qoıylǵandyǵy týraly jalǵan habar bergen er adamnyń bas bostandyǵy 3 jylǵa shekteldi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «102» jedel arnasyna qońyraý shalǵan jigit qalanyń saýda úıleriniń birinde bomba qoıylǵandyǵyn habarlaǵan. Oqıǵa ornyna dereý arnaıy mamandar kelip jetti. Alaıda tekserýden keıin aqparattyń jalǵan ekendigi anyqtaldy.
«Tártip saqshylary kúdiktiniń izin sýytpaı ustady. Ol Óskemen qalasynyń 21 jastaǵy turǵyny bolyp shyqty. Kýálandyrý nátıjesine sáıkes, onyń ortasha dárejedegi mas kúıde ekendigi belgili boldy», - delingen aqparatta.
Atalǵan fakti boıynsha QR QK-niń 273-babyna sáıkes sotqa deıingi tergeý júrgizilip, is sotqa joldanǵan. Qalalyq sottyń úkimimen aıyptalýshy 3 jylǵa bas bostandyǵynan shekteldi.
