Óskemende satyp alynǵan 45 tramvaıdyń 15-i ǵana jolǵa shyqty
ÓSKEMEN. QazAqparat - Óskemenniń jańa ákimi Jaqsylyq Omar qalanyń tramvaı parkine baryp, kásiporyndaǵy qıyndyqtarmen tanysty, dep habarlaıdy QazAqparat tilshisi qalanyń ishki saıasat bólimine silteme jasap.
Óskemen tramvaı parkinde 45 tramvaı bar, sonyń 23-i jolaýshy tasymaldaýǵa jaramdy. Al búgin 15-i ǵana baǵdarǵa shyqty.
Óskemen tramvaı parkinde qıyndyqtar birshama: tramvaılardy, joldardy jóndeý qajet, tipti kásiporynnyń ózin kúrdeli jóndeýden ótkizý ózekti másele bolyp otyr.
Jaqsylyq Omardyń aıtýynsha, bul túıtkilderdi sheshý ishinara tramvaı parkiniń basshylyǵyna baılanysty.
«Problemalar, suraqtar jınalyp qalǵan, al jaýap joq. Qazirgi basty másele - tramvaılardy tezirek iske qosý. Olar memleket qarajatyna satyp alynǵan. Sizder olardy iske qosa alatyn mamandardy izdemeısizder, kompanııany jańǵyrtý boıynsha usynystaryńyz joq. Amal izdeıik, bul problemalardy bizden basqa eshkim kelip sheship bermeıdi», - dedi Jaqsylyq Omar.
Ákim TKSh, jolaýshy kóligi jáne avtomobıl joldary bóliminiń basshysy Rýfat Akramovqa osy máselelerdi sheshý boıynsha usynystar ázirleýdi tapsyryp, aldaǵy dúısenbige deıin ýaqyt berdi.
