Óskemende satyla bastaǵan áleýmettik kómir baǵasy qansha
ÓSKEMEN. KAZINFORM — Óskemen qalasynda kúzgi suranysty kútpeı-aq turǵyndardan áleýmettik kómir satyp alýǵa ótinim qabyldaý bastaldy.
2026-2027 jylǵy jylytý maýsymynda qala turǵyndary úshin jeńildetilgen baǵamen 30 myń tonna kómir satý josparlanyp otyr.
Qala ákimdiginiń málimetinshe, kómir jetkizý jumystary aldaǵy jylytý maýsymyna daıyndyq aıasynda jasalǵan úshjaqty memorandým negizinde júzege asyrylady. Áleýmettik kómirdi Óskemendegi úsh kómir tuıyǵy arqyly satyp alýǵa bolady.
— Jer úı turǵyndary qysqa aldyn ala qamdanýy úshin ótinim qabyldaýdy erterek bastadyq. Bul kómir jetkizýdi birkelki uıymdastyrýǵa jáne suranys kúrt artatyn kezeńde uzyn-sonar kezektiń aldyn alýǵa múmkindik beredi, — delingen aqparatta.
Áleýmettik kómir kommertsııalyq baǵadan 500 teńgege arzan satylady. Qazirgi tańda jetkizýshige qaraı «Qarajyra» kómiriniń bir tonnasy 17 400-17 500 teńge aralyǵynda, al «Maıkúbi» kómiri 17 500 teńge turady. Demek, áleýmettik baǵdarlama aıasynda turǵyndar kómirdi naryqtyq baǵadan tómen baǵamen satyp ala alady.
Áleýmettik kómirdi jetkizýshiler retinde «Seıkom» JShS men «Otyn kompanııasy Termınal» JShS («Qarajyra» kómiri), «Kómir-Dostyq» JShS («Maıkúbi» kómiri) belgilengen.
Áleýmettik kómir satyp alýǵa ótinimdi aýmaqtyq basqarý ortalyqtarynyń fılıaldary arqyly berýge bolady. Sondaı-aq munda turǵyndarǵa qujat rásimdeý jáne kómirdi jetkizý tártibi boıynsha keńes beriledi.
Eske salsaq, osyǵan deıin Qazaqstanda kómir ónerkásibin damytý jospary ázirlenetinin jazdyq.
