Óskemende sapasyna halyq jıi shaǵymdanatyn Ertis kópirinde jóndeý jumystary bastalady
ÓSKEMEN. KAZINFORM – Óskemen qalasynda 1 maýsymnan bastap Ertis kópirinde jóndeý jumystary bastalmaq. Jumystar kezeń-kezeńimen jibek matalar kombınaty shaǵyn aýdany jaǵynan qala baǵytyna qaraı júzege asyrylmaq.
Jóndeý jumystary kezeńinde kólik qozǵalysynyń shemasy ózgeredi. Naqty aıtqanda, qozǵalys jolaqtarynyń ekeýi kezekpen jabylyp otyrady.
Avtokólik júrgizýshilerine qolaısyzdyqty barynsha azaıtý maqsatynda ýaqytsha qozǵalys shemasy uıymdastyrylmaq. Ár baǵyt boıynsha úsh jolaqtan qozǵalys qamtamasyz etiledi. Qozǵalys kólik aǵynynyń júktemesine qaraı retteledi jáne ýchaskede ýaqytsha jol belgileri men qorshaýlar ornatylady.
- Júrgizýshilerden baǵyttaryn aldyn ala josparlaýdy, jyldamdyq rejımin saqtaýdy jáne ýaqytsha jol tańbalary talaptaryn qatań ustanýdy suraımyz. Jóndeý jumystary jol qozǵalysy qaýipsizdigin qamtamasyz etý jáne kópirdiń jaı-kúıin jaqsartý maqsatynda júrgiziledi, - dep habarlady Óskemen qalasy ákimdiginen.
Eske salsaq, osyǵan deıin Óskemendegi Ertis kópiri kúrdeli jóndeý aldynda keshendi tekserýden ótetini habarlanǵan.
