Óskemende Saǵadat Nurmaǵambetovke eskertkish ornatyldy
Qala ákimdiginiń málimetine súıensek, Jibek matalar kombınaty yqsham aýdanynda Saǵadat Nurmaǵambetov atyndaǵy saıabaq ashylyp, batyrǵa eskertkish ornatyldy.
«Mundaǵy maqsat - ult qaharmanynyń esimin el jadynan óshirmeý. Qazaqstan Respýblıkasynyń tuńǵysh Qorǵanys mınıstri túrli qıyndyqtarǵa qaramastan, elimizdiń qarýly kúshteriniń tehnıkalyq bazasynyń irgetasyn qalady. Bul saıabaqtyń qalanyń taǵy bir kórikti jerine aınalatyny sózsiz», -dedi ashylý saltanatynda shahar basshysy Jaqsylyq Omar.
Onyń aıtýynsha, saıabaqtyń jalpy aýdany – 1,5 gektar. Qaq ortasynda granıt tastan Saǵadat Nurmaǵambetovtiń eskertkishi tuǵyrǵa qonǵan. Músinniń bıiktigi 3,6 metr, tuǵyry 4,8 metr.
Saıabaqta otbasylyq demalys úshin barlyq jaǵdaı jasalǵan. Tórt sýburqaq iske qosyldy. Barlyǵy 7 músindik ınstallıatsııa, 48 qumyraly gúl ornatylyp, 200-den astam aǵash otyrǵyzylǵan.
Fotosýretterdi túsirgen – Tileýbek Shaıahmet