Óskemende Sábıler úıiniń dırektory aýrý balalarǵa dep óz esepshotyna aqsha jınaǵan
Óskemendegi Sábıler úıiniń burynǵy dırektory Quralaı Isenovanyń basy daýǵa qaldy. Bul oqıǵa ol osy qyzmetke taǵaıyndalǵan soń arada úsh aı ótkende bastalǵan. Ol qoımadan merzimi ótip ketken jaıalyqtardy kórgen, alaıda eshqandaı shara qoldanbaǵan.
Oblystyq densaýlyq saqtaý basqarmasy basshysynyń orynbasary Vladımır Lıdiń sózine sensek, merzimi ótken bul taýar joıylýǵa tıis bolatyn.
Qazir Sábıler úıinde osyǵan baılanysty muqııat tekserý júrip jatyr. Atalmysh tekserýdiń barysynda Quralaı Isenovaǵa qatysty birqatar jaıttyń basy ashyldy.
«Quralaı Isenova jekemenshik qordy basqarǵan, onysy qujatpen rastalyp otyr. Qaıyrymdylyq uıymynyń quryltaıshy qujattarymen qatar, Facebook paraqshasy da bar. Jaı ǵana ishinara tekserýdiń ózinde aýrý balalarǵa jáne Sábıler úıiniń tárbıelenýshilerine arnap qarjy aýdaratyn esepshot Quralaı Isenovanyń óz atyna rásimdelgen bolyp shyqty. Alaıda Sábıler úıiniń óz resmı esepshoty bar ǵoı. Sondaı-aq, Quralaı Isenova issaparǵa kettim dep esep bergen, biraq onyń issaparǵa barǵanyn rastaıtyn qujattar joq. Demek, munda eńbek zańnamasy óreskel buzylyp tur» delingen basqarma taratqan habarlamada.
Mekemeniń málimetinshe, qazir kishkentaı balamen jumys isteıtin adamdardyń bir jaqqa barýǵa moraldyq quqyǵy joq, óıtkeni bul óte qaýipti - olar koronavırýs juqtyryp ákelip, ony búldirshinderge taratýy múmkin.
«Quralaı Isenovamen jasalǵan kelisimshart buzyldy. Ol synaq merziminen óte almady. Sońǵy málimet boıynsha, onyń taǵy bir sebebi - qaıyrymdylyq qarajatynyń maqsatsyz jumsalýy. Qazirgi tańda sybaılas jemqorlyqqa qarsy tergeý júrip jatyr. Densaýlyq saqtaý basqarmasy mekemeniń ishki jaǵdaıyn turaqtandyrý úshin tıisti sharanyń bárin qabyldaıdy», - deıdi Vladımır Lı.