Óskemende Rústem Esdáýletov atyndaǵy ІІ respýblıkalyq teatr festıvali ótedi
ÓSKEMEN. QazAqparat - Óskemende shaǵyn formatta sahnalanǵan spektaklderdiń Rústem Esdáýletov atyndaǵy ІІ respýblıkalyq teatr festıvali ótedi, dep habarlaıdy QazAqparat tilshisi.
Rústem Esdáýletov atyndaǵy respýblıkalyq teatr festıvali Óskemende 10-14 qarasha aralyǵynda uıymdastyrylǵaly otyr. Festıvalge elimizdiń barlyq óńirlerindegi teatr ujymdary qatyspaq.
Aıta ketsek, Rústem Esdáýletov atyndaǵy І respýblıkalyq festıval 2016 jyly ótken bolatyn. Jastar jáne stýdentter festıvaline ol kezde Astana, Almaty, Qaraǵandy, Kókshetaý, Semeı syndy qalalardan birqatar teatr ujymdary kelgen edi.
Rejısser, teatr jáne kıno akteri, aqyn, dramatýrg Rústem Esdáýlet 1978 jyly týǵan. Qazaqstan oblystyq Jambyl atyndaǵy drama teatrynyń dırektory ári bas rejısseri qyzmetin atqara júrip, qazaq ulttyq sahna óneriniń damýyna eleýli úles qosqan tulǵa. Jas rejısserdiń jetekshiligindegi teatr ujymy birneshe ret halyqaralyq baıqaýlardyń jeńimpazy atanǵan. Qazaq kórermeni úshin Rústem akter retinde de tanymal. «Bórinama» jyr jınaǵynyń avtory. Óleńderi «XXI ǵasyr aqyndarynyń antologııasyna» jáne basqa da ujymdyq jınaqtarǵa engen. Memlekettik «Daryn» jastar syılyǵynyń ıegeri. 2007 jyly «Sháken juldyzdary» kınofestıvalinde «Bes tıyn» kórkem shyǵarmasy úshin arnaıy marapatqa ıe bolǵan.
Rústem Esdáýletov qazaq trýppasyn basqarǵan jeti jyl ishinde 25 qoıylym jasap úlgergen. 2009 jyly trýppa Qaraǵandyda ótken respýblıkalyq teatrlar festıvalinde júldeli úshinshi oryndy ıelendi. Rústemniń juldyzdy jeńisteri alda edi, ókinishke oraı qazaqtyń talantty uly 2009 jyldyń 25 qarashasynda kóz jumdy.
Festıvaldiń ótýine Shyǵys Qazaqstan oblysynyń Mádenıet, arhıvter jáne qujattama basqarmasy men «Jastar teatry» muryndyq bolyp otyr.
