Óskemende reıske jańa avtobýstar shyǵady
ÓSKEMEN. QazAqparat – Óskemen qalasynda reıske jańa avtobýstar shyǵady, dep habarlaıdy QazAqparat tilshisi.
Aımaq basshysy Danıal Ahmetov Semeı qalasyndaǵy «SemAZ» zaýytyna baryp, aldaǵy ýaqytta Óskemen kóshelerinde qatynaıtyn jańa avtobýstarmen tanysty.
Bul qoǵamdyq kólikter múmkindigi shekteýli jandarǵa yńǵaıly etip jasalǵan. Jýyq arada biz Qazaqstan damý bankimen barlyq jumysty aıaqtaǵan soń avtobýstar Óskemen qalasyna jetkiziledi. Jańa qoǵamdyq kólikterdi shyǵarýǵa 3,5 mlrd teńge jumsaldy, – dedi ShQO ákimi.
Aıta keteıik, jyl basynda Óskemenge 80-nen astam avtobýs satyp alynatyndyǵy aıtylǵan edi.
Esterińizge sala ketsek, osyǵan deıin Shyǵys Qazaqstan oblysyndaǵy medıtsınalyq mekemeler 60 jańa jedel járdem kóligimen tolyqqandyǵy habarlanǵan bolatyn.
