Óskemende Respýblıka kúnine oraı Memlekettik Tý saltanatty túrde kóterildi
ÓSKEMEN. KAZINFORM — Óskemendegi amfıteatr alańynda Respýblıka kúnine arnalǵan saltanatty rásim ótip, Qazaqstannyń kók baıraǵy bıikke kóterildi. Memlekettik Ánuranmen ashylǵan sharada el egemendiginiń tarıhı máni, táýelsizdikti saqtaý men memlekettilikti nyǵaıtýdyń jaýapkershiligi sóz boldy. Merekelik jıynǵa jınalǵan jurtshylyq ulttyq merekeni ortaq maqtanysh pen elge degen súıispenshiliktiń belgisine aınaldyrdy.
Memlekettik Tý — el egemendiginiń aıǵaǵy, ulttyq biregeılik pen halyqtyń asqaq rýhynyń sımvoly. Sondyqtan kók baıraqtyń kókke kóterilgen ár sáti táýelsizdiktiń qadirin, azat eldiń aldyndaǵy ortaq jaýapkershilikti eske salady. Respýblıka kúnine oraı Óskemende ótken saltanatty rásim de osy qundylyqtardy ulyqtaǵan taǵylymdy sharaǵa aınaldy.
Merekelik jıynda aldymen Qazaqstan Respýblıkasynyń Memlekettik Ánurany oryndaldy. Áýenmen birge kók Tý saltanatty túrde kóterilip, alańǵa jınalǵan jurtshylyqtyń kóńilin tolqynys pen maqtanysh sezimi kernedi.
Sharada Shyǵys Qazaqstan oblysynyń ákimi Nurymbet Saqtaǵanov jerlesterin Respýblıka kúnimen quttyqtap, bul merekeniń el tarıhyndaǵy aıryqsha ornyn atap ótti.
— Barshańyzdy elimizdiń eń basty merekesi — Respýblıka kúnimen shyn júrekten quttyqtaımyn! 1990 jylǵy 25 qazanda Memlekettik egemendik týraly deklaratsııa qabyldanyp, elimizdiń táýelsizdikke bastar tarıhı joly aıqyndaldy. Bul — halqymyzdyń san ǵasyrlyq azattyq jolyndaǵy kúresiniń, ata-babalarymyzdyń asyl armanynyń zańdy jalǵasy, — dedi oblys ákimi.
Memlekettik egemendik týraly deklaratsııa Qazaqstannyń táýelsiz memleket retinde qalyptasýyna negiz bolǵan tarıhı qujattardyń biri sanalady. Bul kúnniń ulttyq mereke retinde qaıta jańǵyrýy da onyń eldik sanany nyǵaıtýdaǵy mańyzyn aıqyndaıdy.
— Halqymyz «Egemen bolmaı, el bolmas» dep beker aıtpaǵan. Óıtkeni táýelsizdik — elimizdiń tiregi, halqymyzdyń erkindigi men bolashaǵynyń kepili. Memleket basshysy, Prezıdentimiz Qasym-Jomart Kemeluly Toqaev «Egemendik — ár halyqqa buıyra bermeıtin baq» dep, onyń baǵa jetpes qundylyq ekenin atap ótken. Rasynda, táýelsizdigimizdi saqtaý, memlekettiligimizdi nyǵaıtý jáne osy asyl murany keler urpaqqa amanat etý — barshamyzǵa ortaq qasıetti mindet, — dedi Nurymbet Saqtaǵanov.
Sondaı-aq, oblys ákimi elimizde júzege asyp jatqan saıası ózgeristerge toqtaldy. Onyń aıtýynsha, jańa Konstıtýtsııanyń qabyldanýy, Qazaqstan Respýblıkasynyń Quryltaıy men Qazaqstan Halyq Keńesiniń jańa konstıtýtsııalyq júıedegi orny memlekettilikti damytýǵa jáne halyqtyń el isine qatysý múmkindikterin keńeıtýge baǵyttalǵan mańyzdy qadamdar sanalady.
Nurymbet Saqtaǵanov Memlekettik Týdyń mán-mańyzyna da erekshe toqtalyp, kók baıraqtyń eldiń azattyǵy men ulttyq maqtanyshyn beıneleıtinin atap ótti.
— Kók Tý — azattyǵymyzdyń aıǵaǵy! Kók Tý — elimizdiń eńsesi! Kók Tý — halqymyzdyń asqaq rýhynyń kórinisi! Onyń kók túsi — beıbitshilik pen birlikti, shýǵylaly Kún — jarqyn bolashaqty, al qyran — erkindik pen bıik muratty beıneleıdi. Búginde kók týymyz álemniń ár túkpirinde jelbirep, elimizdiń abyroıyn asqaqtatyp keledi. Ony qasterlep, árdaıym bıik ustaý — árbir azamattyń Otan aldyndaǵy perzenttik paryzy, — dedi oblys ákimi.
Quttyqtaý sóziniń sońynda aımaq basshysy el birligi men yntymaǵynyń mańyzyn atap ótip, shyǵysqazaqstandyqtarǵa amandyq pen bereke tiledi.
— Halqymyz «Egemen eldiń eńsesi bıik» deıdi. Kók baıraǵymyzdyń bıiktigi — el mereıiniń bıiktigi! Endeshe, elimiz eńseli, birligimiz bekem, egemendigimiz baıandy bolsyn! Týymyz tuǵyrynan túspesin! Kók baıraǵymyz kógimizde máńgi jelbiresin! Ulttyq mereke — Respýblıka kúni qutty bolsyn! — dedi oblys ákimi.
Saltanatty rásimnen keıin merekelik baǵdarlama oblys ónerpazdarynyń kontserttik qoıylymdaryna ulasty. Patrıottyq ánder shyrqalyp, týǵan jerge, Otanǵa degen súıispenshilikti dáripteıtin shyǵarmalar oryndaldy. Amfıteatr alańyna jınalǵan óskemendikter men qala qonaqtary merekelik kóńil-kúıdi birge bólisip, elge degen aqjarma tilekterin jetkizdi.
Óskemen qalasyndaǵy № 29 mekteptiń tarıh pániniń muǵalimi Aıdar Ábilmajınov Respýblıka kúniniń árbir qazaqstandyq úshin orny bólek ekenin aıtty.
— Búgin — óte úlken mereke, aıtýly kún. Kók baıraǵymyz bıikte jelbirep, elimizde beıbitshilik pen kelisim saltanat qursyn! Barlyq qazaqstandyqty osy aıtýly kúnmen quttyqtaımyn! Alǵa, Qazaqstan! — dedi ol.
Al Óskemen qalasyndaǵy № 13 mekteptiń dırektory Bıbigúl Abdosheva merekege oraı jurtshylyqqa izgi tilegin arnady.
— Búgingi Respýblıka kúni qutty bolsyn! Barsha halyqqa zor densaýlyq, taýsylmas qaırat, jumysta tabys tileımin. Qazaqstanymyz máńgi jasaı bersin, táýelsizdigimiz bekem bolsyn! Ár otbasyna amandyq, qut-bereke tileımin, — dedi Bıbigúl Abdosheva.
Qala turǵyny Nurjan Bekturov ta saltanatty sharaǵa qatysyp, barsha qazaqstandyqty ulttyq merekemen quttyqtady. Ol merekelik jıynǵa kishkentaı sábıin kóterip kelgen.
— Búgin barsha qazaqstandyqty Respýblıka kúnimen quttyqtaımyn. Kók baıraǵymyz máńgi jelbireı bersin! — dedi Nurjan Bekturov.
Merekelik sharaǵa jınalǵan óskemendikter men qala qonaqtary da ortaq tilekterin bildirip, eldiń amandyǵy men táýelsizdiktiń baıandy bolýyn tiledi.
«Elimiz eńseli, birligimiz bekem, egemendigimiz baıandy bolsyn! Kók týymyz kógimizde máńgi jelbiresin! Respýblıka kúni qutty bolsyn!» degen izgi nıet saltanatty jıynnyń ortaq únine aınaldy.
Respýblıka kúni — tarıhı jadyny jańǵyrtyp qana qoımaı, búgingi urpaqtyń el bolashaǵy aldyndaǵy jaýapkershiligin aıqyndaıtyn mereke. Onyń máni memlekettik rámizderdi ulyqtaýmen shektelmeıdi. Bul kún — egemendiktiń qadirin túsiný, ulttyq birlikti bekemdeý jáne Qazaqstannyń bolashaǵy úshin ortaq jaýapkershilikti seziný kúni. Óskemendegi saltanatty rásim osy qundylyqtardy taǵy bir márte aıshyqtap, merekelik kontsertpen jalǵasýda.
