Óskemende respýblıka boıynsha alǵashqy vırtýaldy medıatsııa kabıneti ashyldy
ASTANA. QazAqparat - Óskemendegi respýblıka boıynsha alǵashqy vırtýaldy medıatsııa kabınetiniń ashylýyna sýdıalar, oblys ákimdiginiń ókilderi, kásibı medıatorlar jáne kásibı medıatorlar qaýymdastyǵynyń músheleri qatysty, dep habarlaıdy Shyǵys Qazaqstan oblystyq sotynyń baspasóz qyzmeti.
Shyǵys Qazaqstan oblysy ákimdigi apparatynyń qoǵamdyq kelisim ortalyǵy - Dostyq úıiniń dırektory Eldar Tóleýbaev is-sharany asha kele: «Bul - vırtýaldy kabınet Qazaqstan boıynsha teńdesi joq alǵashqy joba. Onyń artyqshylyǵy daýly máselelerge tap bolǵan adam ózine yńǵaıly jerde kompıýter nemese qalta telefony arqyly kásibı medıatorlarmen baılanysqa shyǵa alady», - dedi.
Oblystyq sottyń sýdıasy Eldos Jumaqsanov óz sózinde atalǵan joba - Memleket basshysynyń Joldaýynyń tórtinshi baǵytyn, ıaǵnı «Tsıfrlyq Qazaqstan» baǵdarlamasyn iske asyrý aıasynda engizilgendigin atap ótti. Jobanyń keleshekte medıatsııany damytýǵa zor yqpal etetindigine de jetkizdi.
Sondaı-aq E.Jumaqsanov «Tsıfrlyq Qazaqstan» memlekettik baǵdarlamasynyń negizgi maqsaty Qazaqstan ekonomıkasynyń básekege qabilettiligi men sandyq ekojúıeni damytý arqyly halyqtyń ómir súrý deńgeıin arttyrý ekendigine toqtaldy.
Aǵymdaǵy jylǵy 20 sáýirden bastap óz qyzmetin bastaıtyn «Vırtýaldy medıatsııa» kabıneti Óskemendegi Dostyq úıiniń saıtynda ornalasqan. Óńir turǵyndary atalǵan saıtqa tirkelý arqyly medıatorlarǵa júgine alady.
Іs-sharaǵa qatysýshylar kezdesý barysynda atalǵan jobany jetildirýge baǵyttalǵan birqatar usynymdary men pikirlerin bildirdi.
